Cabugao, Ilocos Sur – Sinabet dagiti kameng ti Pamilia-LGU Cabugao ti imahen ni Patron San Markos Ebanghelista iti sanguanan ti Simbaan Romano Katolika ket inturongda iti sanguanan ti Munisipio (Presidencia) a ditoy ti nakaiplastaran ti Patron ti Ili iti imatang ti kaaduan ken dagiti kameng ti Pamilia-LGU nga idauluan ni Mayor Edgardo “Ediboy” S. Cobangbang, Jr. idi Abril 28, 2014.
Iti panangrugi ti Misa, naibasa ti Mensahe iti Pammasangbay babaen ken ni Mayor Ediboy sakbay a narugian ti Nasantuan a Misa iti panangannong ni Rev. Fr. Felix Costales, Parish Priest ti Cabugao Catholic Church.
Sakbayna, babaen iti Pammilin ti Opisina ti Ama ti Ili idi Abril 7, 2014 ket naipakaammo kadagiti amin a kameng ti Pamilia-LGU a mapusgan ita a Tawen 2014 nga agbalin a “Hermana Mayor” ti LGU-Cabugao ket makipagyan ti Imahen ni San Markos Ebanghelista iti makatawen ditoy Munisipio. Kas panangrespeto iti isasangbay ti Patron ti Ili ket maigunamgunam nga agatendar ti amin nga Empleado ken dadaulo iti Opisina ti LGU-Cabugao a mangsabat iti Imahen ken agatendarda iti Nasantuan a Misa a maaramid iti Munisipio.
Kalpasan ti Misa, naisimpa ti Imahen ti Patron iti naisadia a pagyananna iti Municipal Conference Building ket nairuknoyan ti Kararag (Novena) babaen kadagiti Deboto. Maangay ti panagnobena ken panag-vigil dagiti empleado iti siam nga aldaw.
Kalpasan ti Misa, naangay iti panagtataripnong dagiti Empleado ken agraman dagiti Opisiales ti Ili babaen iti naaramid a salu-salo iti uneg ti Munisipio. # (Web In-Action)
No comments:
Post a Comment