AGRICULTURE AND FISHERY DAY, UMUNA NGA ALDAW TI PIESTA

Cabugao, Ilocos Sur – Narambakan ti Agriculture and Fishery Day kas pakauna  nga aldaw ti 2014 Ragsak  Cabugao Festival iti Abril 23, 2014  iti  panagpiesta ti ili a Cabugao, Ilocos Sur iti Abril 23-26, 2014.

Immuna a naaramid ti Parada iti aglikmut ti Poblasion a nangrugi ken nagtungpal iti  Cabugao Central Park (CCP), Brgy. Bonifacio, Cabugao, Ilocos Sur.

CLICK HERE TO VIEW MORE PHOTOS

Iti Parada, immuna ti Mobile Patrol Car ti Municipal Police Station-Cabugao  sa simmaruno   dagiti Opisiales ti LGU Cabugao nga indauluan ni Mayor Edgardo “Ediboy” S. Cobangbang, Jr. ken ni Vice Mayor Deogracias Jose Victorino H. Savellano agraman dagiti Konsehales ti ili. 

Simmaganad  ti grupo dagiti Opisiales ti Pederasion ti Farmers,    Fishermen, RIC, 4-H Club ken dadduma pay a Federated Organization nga adda iti salinong ti Agriculture Sector. 

Simmaruno  dagiti 33 a barangays  (Alphabetical Order ngem immun-una ti Letra Z to A) a nakabuklan dagiti kameng ti  Barangay Council, Farmer’s Group, RIC, 4-H Club, Cooperatives ken dadduma pay a Barangay-based Organizations.  

CLICK HERE TO VIEW MORE PHOTOS

Nakikaysa met dagiti Marching Band dagiti pageskuelaan ti ili a  Cabugao. Naurnos  ti trapiko babaen iti panangiwardas dagiti Polis ken Public Safety Officer nga idauluan ni Cabugao Chief of Police William N. Nerona.

Iti rugi ti programa, nangipaay ti Mensahe ni Mayor Edgardo “Ediboy” S. Cobangbang, Jr. iti panaglukat ti umuna nga aldaw ti Piesta. Kinablaawan ni Mayor Ediboy ni Governor Ryan Luis V. Singson ken dagiti kakaduana iti Kapitolio Probinsial nga isu ti kangrunaan a sangaili iti dayta nga aldaw. Impeksa ti Ama ti Ili iti aglaplapusanan a ragsakna ken panagyamanna iti kaadu ti umili a nakipaset iti Parada ken nangsarabo ken ni Gov. Ryan iti yaayna ditoy Cabugao a mangiyeg iti nagkaadu a pagimbagan dagiti mannalon/asosasion  kas iti maited a 2 a Traktora, 4 a Kuliglig, 1 a Shredder machine, 1 Shallow Tube Well, 1 Portable water Pump, Rolyo ti Hose ken Solar Kits.

Inulit ni Mayor Ediboy ti panagyamanna ken ni Gobernador   Ryan  ta nakagasgasat ti ili a Cabugao kadagitoy a naisagut kadagiti mannalon.

CLICK HERE TO VIEW MORE PHOTOS

Daytoy a nagasat ken naragsak a rugi ti Cabugao Ragsak Festival 2014 ket agtultuloy koma nga awiten ti sapasap agingga nga agleppas ti Piesta, segun pay kenkuana. Pinagyamananna met dagiti amin nga adda akemna iti pannakaisagana dagiti mabuya ken aktibidad kadaytoy nga umuna nga aldaw ti panagpiesta ti ili kasta metten iti Konseho Munisipal nga idauluan ni Vice Mayor DJ Savellano.

Iti Mensahe ni Governor Ryan, impeksana met ti napalaus a ragsak ken panagyamanna iti amin nga umili ti Cabugao nga idauluan ni Mayor Ediboy iti nakitana a kaadu ken nakaysa a panagrambak dagiti umili iti umuna nga aldaw ti Piesta.

Innayon ti Gobernador a nagbalin nga inspirasionna ti talek ken suporta dagiti umili kenkuana ket kayatna a maiprayoridad ti sektor ti agrikultura ken iti impraestruktura ket imbatadna nga “Aramid ti Pakakitaan” iti panangiyegna iti tulong ditoy nga ili.

Malaksid kadagiti ramit/makinaria ti agrikultura nga itedna, imbinsana pay dagiti proyekto a maipaay kadagiti barangay ti ili a kangrunaan iti pannakapasayaat dagiti kalsada ti barangay babaen iti RA 7171.

CLICK HERE TO VIEW MORE PHOTOS

Naangay ti Ceremonial ti panangyawat ni Gov. Ryan ken ni Mayor Ediboy agraman dagiti kameng ti Konseho Munisipal iti bulto dagiti maited a ganagan kadagiti mannalon; nagsaruno met nga inyallawat ti Gobernador dagiti makinaria ken ramit ti agrikultura kadagiti benepisiario a barangay ken asosasion kasta met nga inyawat ti Ama ti Probinsia  dagiti Solar Kits ken ni Mayor Ediboy iti imatang dagiti Opisiales ti LGU-Cabugao a para kadagiti awan ti pagsilawanna iti ili.

Kas subad iti adu a tulong ti Gobernador, indauluan da Mayor Ediboy ken ni Vice Mayor DJ Savellano  nga inyawat ti resulta ti Soil Fertility Mapping Project iti Ama ti Probinsia   kas naipangruna a programa ken gapuanan para iti sektor- agrikultura.

Iti saan nga agsarday nga ayat ni  Gobernador Ryan, nangted iti P100,000 a sagutna iti panagpiesta ti ili.

Naaramid pay ti pannakai-Award ti 102 a Titulo babaen iti “Handog Titulo Program”  a nagbuligan ti DENR Region 1 ken ti LGU-Cabugao a resulta ti inisiatiba da DENR Regional Technical Director (Lands) Miss   Lydia Lopez ken ni Mayor Ediboy para iti programa ti libre a panagpatitulo ti daga (agriculture ken residential). Binayabay ni Mayor Ediboy ni Governor Ryan agraman dagiti Opisiales ti LGU,  DENR ken CENRO, Brgy. Officials  iti pannakaited dagiti Titulo kadagiti Benepisiario babaen iti ceremonial awarding.

Kabayatan ti programa ket naaramid met ti pananggrado dagiti napili a Hurado kadagiti mangabak a Float, PINAKA MALAKING KAMBING   Best in Costume Goat.

Naaramid pay ti pannakalukat ti Trade Fair babaen iti pannakaidispley ti “One Barangay One Product” ken dadduma pay a pannakipaset dagiti  Exhibitors.

Napnuan ragsak dagiti nakiparada/nakipartisipar a nangsango kadagiti dadduma pay a pagrebbengan/aramidenda iti panagtultuloy ti mabuya iti dayta nga umuna nga aldaw ti Piesta.

Nasangaili met ti LGU-Cabugao da Bokal Edgar Yabes ti First District, Ilocos Sur ken ni Provincial Agriculturist Teofilo R. Quintal. 

Nagpaay nga Emcee ni SB Secretary Maxfel S. Suboc.  # (Web In-Action)