Cabugao, Ilocos Sur - Mairugi manen ti panagmula dagiti kameng ti Cabugao Vegetable Growers and Producers Association nga idauluan
ni Mr. Armando Azcueta iti Off-Season Type a klase ti nateng ita a bulbulan tapno agtultuloy nga adda trabaho dagiti padana a vegetable growers/traders ken saan a mapulsot ti pannakapataud ti suplay ti nateng a mangbalanse iti pagkasapulan iti merkado.
Insupusop ni Mrs. Ester P. Aguimbag, AT, High Value Crop Development Program Coordinator a no agkurkurang ti mailako a nateng ket kapilitan a mapan agangkat dagiti traders iti sabali nga ili ket agresulta no kua iti panagngina ti presio a mangparigat kadagiti konsumidores ket kayatda a maantisiparan/maliklikan koma daytoy a problema.
Imbatad ti kaaduan a Vegetable Growers a sinagrapda itay kallabes a panagmumula dagiti padada nga agnatnateng iti napintas a presio a nangruna iti sili ket agyamyamanda iti agtultuloy a suporta ti LGU Cabugao kadagiti gannuatda a mangpapintas ti kasasaadda nga agmulmula ken agnegnegosio iti nateng.
Kabayatanna, naited kadagiti mannalon iti pangrugianda a bukel manipud iti DA-LGU babaen ken ni Mrs. Ester P. Aguimbag, AT, HVCDP Coordinator ken kaduada a nagplano a manggun-od ti kasapulanda pay a dadduma a bukbukel tapno maipamaysada ti agmula itoy a bulbulan.
Kagiddan a tinamingda iti nadakamat a mitingda idi Abril 28, 2014 ket iti panangpatibkerda ti asosasionda a nangruna iti pannakapapintas ti recording kasta met iti Financial a kasasaad ti asosasionda tapno agtultuloy a nasayud iti operasionda a kas maysa nga organisado a pagtuladan a sektor. # (Web In-Action)
No comments:
Post a Comment