Cabugao, Ilocos Sur- Naaramid ti Night Celebration ti Agriculture and Fishery Day idi Abril 23, 2014 iti Cabugao Central Park (CCP), Brgy. Bonifacio, Cabugao, Ilocos Sur.
Nagatendar ditoy dagiti Opisiales ken Miembros ti nadumaduma nga Asosasion, dagiti Opisiales ti ili ken barangay, mannalon, mangngalap, Rural Improvement Club (RIC), 4-H Club, Cooperative Officers ken dagiti umili ti Cabugao.
 |
| CLICK HERE TO VIEW MORE PHOTOS |
Kalpasan ti kararag nga indauluan ni Mrs. Grenalyn Amoroso, Federated RIC President, linuktan ni Municipal Agriculturist Zenaida S. Andrada ti programa ket kimmablaaw ken nagyaman iti partisipasion dagiti asosasion dagiti mannalon/mangngalap ti ili a Cabugao, Ilocos Sur. Dinakamat ni Mrs. Andrada a babaen iti liderato ni Mayor Edgardo “Ediboy” S. Cobangbang, Jr., naipasagepsep kadagiti mannalon ti kaipapanan ti umisu/kabaruanan a Teknolohia ti panagtalon (babaen iti nagduduma a Demonstration Farm) ken natulongan dagiti mangngalap iti pannakaipaay dagiti naipanawen a serbisio tapno sumayaat ti kasasaadda a kas mayoridad nga umili ti Cabugao.
Naisaruno ti naaramid a Grand March nga indauluan da Mayor Ediboy ken ni Vice Mayor Deogracias Jose Victorino “DJ” H. Savellano.
Nagsarita met ni SBM Benedicto M. Savellano, Committee Chair on Agriculture and Fishery ket bininsana ti pateg ti aldaw dagiti mannalon ken mangngalap a panglukat ti Piesta ti ili ta daytoy ti pagtaudan iti pagbiagan ti mayoridad nga umili ken kas pagyaman metten iti agtultuloy a parabur iti Namarsua.
Naaramid ti Mass Oath-Taking dagiti Opisiales ti Asosasion ti Farmer’s, Fishermen, RIC, 4-H Clubs ken Cooperative Officers iti 33 a barangays babaen iti panangannong ni Mayor Ediboy.
 |
| CLICK HERE TO VIEW MORE PHOTOS |
Naisaruno ti panangipaay ni Mayor Ediboy ti Mensahena ket impeksana ti nabara a kablaawna iti amin nga umili iti panakipagrambakda iti panagpiesta ti ili. Pinaayabanna iti sango dagiti empleado ti Municipal Agriculture Office nga idauluan ni Mrs. Andrada. Pinadayawanna ida ta isuda ti katinnulongna iti pannakagun-od ti ili a Cabugao a maysa kadagiti Top LGU iti National Rice Achiever’s Awards nga impaay ti Department of Agriculture (DA) iti National Level ita a tawen. Bininsana pay ti pateg iti agtultuloy a panagtutunos ti amin a sektor a kas nasamay a galad a mangitunda iti ad-adu pay a panagdur-as a mangital-o ti kasasaad ti sapasap nga umili ti Cabugao.
Binigbigna pay ti pateg ti pannakidanggay ti amin a Cabugaoenios a makipagrambak iti panagpiesta ti ili.
Pinagyamanan pay ti Ama ti Ili iti Apo a Namarsua kadagitoy a parabur a masagsagrap ti ili ket kunana nga uray isuna ket nakagasgasat ta naikkan iti gundaway nga agserbi ken iti agtultuloy a panangited dagiti umili iti talek ken pammati nga inspirasionna a mangbukel ti ad-adu pay a pamanunotan ken proyekto para iti pagrang-ayan ti ili ken iti kaaduan.
Naisaganad ti panagpabuya dagiti kameng ti Cabugao Cultural Troupe (CCT).
 |
| CLICK HERE TO VIEW MORE PHOTOS |
Naibaet ti Search for Mr. & Mrs. Cabugao Farm/Fishing Nanay at Tatay 2014 ken ti Search for Mr. & Miss Cabugao 4-H’ers.
Napili da Elmer Bromeo ken ni Elena Sarinas para iti Mr. & Mrs. idinto ta da met John Michael Castillo ken ni Renelita Sevilleja ti Mr. & Miss 4-H’ers.
Kalpasanna, naited dagiti premio kadagiti mannalon/asosasion a nakagun-od ti pammadayaw kadagiti nadumaduma a kategoria a napagsasalipan iti Agriculture and Fishery Day babaen iti panangited ni Mayor Ediboy a binayabay dagiti SB Members nga idauluan ni Vice Mayor DJ Savellano.
Nakoronaan dagiti napili a Mr. & Mrs. Cabugao Farm/Fishing Nanay at Tatay 2014 babaen iti panangisaad da Mayor Ediboy ken ni Vice Mayor DJ ken dagiti kinaparehada.
 |
| CLICK HERE TO VIEW MORE PHOTOS |
Kalpasan ti Awarding of Prizes, impakita ti Amy Justo and Her J-Jammers Orchestra ti Variety Show Presentation dagiti lallaki ken babbai a kamengna a nangray-aw kadagiti nagbuya.
Words of Gratitude ti binagi ni Mr. Rogelio Barlolong, MAFC Chairman ti ili a Cabugao.
Iti nasao a rabii, nakikaysa met dagiti Opisiales ti barangay nga idauluan ni ABC President, Brgy. Captain Teddy U. Soller, SBM Danny Q. Gazmen, SBM Vicky S. Serna, SBM Jayhan Alcid-Tan, SBM Dr. Jemaima S. Tan-Yee, ken ni SBM Josefina S. Vallejo.
Nagpaay nga Emcee da Mrs. Grenalyn P. Amoroso ken ni Mrs. Joenah G. Sevilleja. # (Web In-Action)
 |
| CLICK HERE TO VIEW MORE PHOTOS |
No comments:
Post a Comment