Monday, April 7, 2014

BOX CULVERT, NAM-AY TI PUROK ITI BRGY. PUG-OS

Cabugao, Ilocos Sur – Naileppasen ti Construction of Box Culvert (Phase 1)  ti Barangay Pug-os, Cabugao, Ilocos Sur a napunduan babaen iti  RA 7171 iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Iti pannaki-amad ti Web In-Action kadagiti pumurok nga asideg ken masakbayan daytoy a box culvert itay nabiit, pagyamyamananda iti Barangay Council nga idauluan ni Brgy. Captain Arnold “Bambi” V. Yangat ken ti LGU-Cabugao nga idauluan ni Mayor Ediboy ta naaramid daytoy a pasilidad a mabalinda a pagdalanan ken mangalay-ay  ti danum nangruna no agtudtudo ti tiempo.

Ita pay ket mapagnumaranen  dagiti magmagna kadaytoy a pagdalanan iti ngatona nga istraktura nupay addanto  tuloyna a Phase 2 a mangitundanto iti igid ti kabaybayan ti Barangay Pug-os.

Dagitoy a pagnam-ayan ket gubuay ti napintas a panagtutunos dagiti pumurok ken bumarangay ken kasta met iti agtultuloy a pannakikammayetda iti Konseho ti Barangay ken iti Gobierno Lokal ti ili a Cabugao, Ilocos Sur. # (Web In-Action)

No comments:

Post a Comment