Cabugao, Ilocos Sur – Iti pannakiuman ti Web In-Action idi Abril 15, 2014, imbaga ni Waterworks Superintendent Engr. Nestor B. Somera nga agtultuloy latta ti ipaayda a serbisio kadagiti umili nga end-users ti danum a mainum nga aggapu iti Magarang Water Springs, Brgy. Cacadiran, Cabugao, Ilocos Sur ken iti Roma-Kinalian Sources iti Brgy. Maradodon ken Brgy. Catucdaan.
Iti agdama, maipatpatungpal iti dry run ti water rationing tapno maalay-ayan ti panages-es ti danum kadagiti masakupan ti service area ti waterworks iti suplay ti danum nangruna ita a summer months. Kabayatanna, adda met latta dagiti connection line ti tubo a tarimaanenda gapu iti panagrukop wenno dadduma pay a pakaigapuan ti panagproblema iti main line ken distribution line. Ngem maaksionan a daras dagitoy ta agtultuloy ti repair and maintenance ti Opisinada.
Innayon pay ni Engr. Somera nga aksionanda dagiti awag dagiti water-users ta inaldaw a nakasapulan ti danum.
Insupusop ti Waterworks Superintendent a madagdagus a mataming ti pakaseknan dagiti water consumers agsipud ta kankanayon latta met ti panagrekurida/monitor dagiti Collectors, Pifefitters ken Personnel a masakupan ti Cabugao Waterworks System.
Segun ken ni Mr. Somera a dagiti posible a pakaigapuan ti panages-es ti suplay ti danum ket iti panagadu ti makali a bubon ken no panawen ti tikag. # (Web In-Action)
No comments:
Post a Comment