MFARMC, SARIKEDKED DAGITI MANGNGALAP

Cabugao, Ilocos Sur –Nagmiting ti  Municipal Fishery and  Aquatic  Resource Management Council (MFARMC) a pakabuklan ti nadumaduma nga asosasion ti mangngalap kadagiti pito a barangay ti ili kas iti Brgy. Dardarat, Salomague, Daclapan, Namruangan, Salapasap, Sabang, ken Pug-os ti ili a Cabugao, Ilocos Sur itay nabiit.

Daytoy a Pederasion ti mangngalap ket daytoy  ti kakinnibin ti LGU-Cabugao nga idauluan ni Mayor Edgardo “Ediboy” S. Cobangbang, Jr. a makikamkammayet iti Bureau of Fisheries and Aquatic Resources (BFAR)-Region 1 nga idauluan ni BFAR Regional Director  Nestor  Domenden, CESO V, tapno mailungalong dagiti kangrunaan unay a kasapulan dagiti mangngalap iti ili ti Cabugao ket maingato ti matgedanda iti panagkalapda  ken  maalay-ayan ti kasasaad ti panagbiagda.

Maibatay iti Accomplishment Report ti Municipal Fishery and  Aquatic  Resource Management Council (MFARMC), dagiti sumaganad ti maitultuloy/mainaynayon a  gapuananda  ita a pakauna a bulan ti Tawen 2014:

1.Agtultuloy ti mangrove re-planting iti Brgy. Dardarat, Salomague, Sabang, Salapasap ken ti Barangay Pug-os.

2.Pannakaited ti Gillnet (single) iti Pug-os Fishermen Association ken iti Namruangan Fishermen Association babaen ti BFAR-OPAG-Ilocos Sur.

3.Agtultuloy a pannakaaramid ti Coastal Clean-up kadagiti pito a barangay babaen iti sapasap a pannakitaming dagiti lumugar ken Opisiales ti Barangay.

4.Pannakaited ti lima a Payao Project itay nabiit kadagiti asosasion ti mangngalap iti Barangay Namruangan babaen ken ni Gov. Ryan Luis V. Singson.

Kangrunaan a nagtaudan dagiti proyekto/programa  a naited kadagiti Fishermen Associations  ket manipud iti Ahensia ti Bureau of Fisheries and Aquatic Resources (BFAR)-Region 1/LGU-Provincial babaen ken ni Gov. Ryan Luis V. Singson babaen iti agtultuloy a  panangilungalong ti   LGU Cabugao nga idauluan ni Mayor Edgardo “Ediboy” S. Cobangbang, Jr. 

Ti met DENR-ENRMO; PCA;  OISCA-Japan ken iti CSC-Vigan City no maipapan met iti suporta para iti Coastal Clean-up ken iti Mangrove Planting dagiti mangngalap. # (Web In-Action)