Cabugao, Ilocos Sur – Tumultulong ti grupo ti Clean and Green Program ti Munisipio nga agdalus kadagiti igid ti kabaybayan babaen iti agtultuloy a panangmonitor ken panangilungalong da MENRO Edgar S. Balangatan, AT, ken ni Mrs. Milagros R. Paz, Municipal Fisheries Coordinator, agak-akemda a dadaulo ti grupoda, kasta metten iti itutulong dagiti Barangay Officials ken dadaulo ti Fishermen Associations kadagita a lugar kabayatan nga iwakasda a linisan iti agsumbangir ti National Highway manipud iti Brgy. Sagayaden nga agpatingga iti Brgy. Pug-os.
Innayon ni MENRO Balangatan nga agtultuloy a monmonitorenda iti Cleanliness and Beautification dagiti pito a Coastal Barangays a kas iti Barangay Dardarat, Salomague, Sabang, Namruangan, Salapasap, Daclapan ken Pug-os babaen iti pannakikammayetda kadagiti Opisiales ti barangay kadagitoy a lugar ken dadaulo ti mangngalap. Tumulongda pay a mangdalus iti agsumbangir a paset ti National Highway iti agpa-Port Salomague ken kadagiti kalsada nga agturong kadagiti nalatak a Tourist Destinations ti ili a kas iti Barangay Sabang, Dardarat, Salomague, Salapasap ken Pug-os tapno makatulongda pay iti programa ti Munisipio a mangitandudo iti Turismo.
Imbatad pay ni MENRO Balangatan a makaay-ayo a buyaen iti panaguurnosda iti igid ti baybay dagiti color-coded fishing boats dagiti mangngalap.
Dagitoy nga aksion ken inisiatiba ket paset ti Direktiba ti Municipal Chief Executive ti ili iti agtultuloy a pannakaipakat ti panagdaldalus ken panangpapintas iti aglawlaw, iti parte ti kadandanuman ken takdang, a pagsayaatan ken pakairanudan met laeng iti sapasap ken panagsagana iti umadani a panagpiesta ti ili iti Cabugao inton Abril 21-26, 2015 a mangparagsak kadagiti umili/bisita iti daytoy a Summer Vacation 2015. # (Web Situational Report)
No comments:
Post a Comment