Cabugao, Ilocos Sur - Isungsong latta dagiti kameng ti Cabugao Vegetable Growers and Producers Association nga idauluan ni Mr. Armando Azcueta iti panagmula iti Off-Season Type a klase ti nateng ita a bulbulan nangruna kadagiti disso nga adda supisiente a suplay ti danum a pagsibog tapno agtultuloy nga adda trabaho dagiti padada a vegetable growers/traders ken saan a mapulsot ti pannakapataud ti suplay ti nateng a mangbalanse iti pagkasapulan iti merkado.
Insupusop ni Mrs. Ester P. Aguimbag, AT, High Value Crop Development Program Coordinator a no agkurkurang ngamin ti mailako a nateng ket kapilitan a mapan agangkat dagiti traders iti sabali nga ili ket agresulta no kua iti panagngina ti presio a mangparigat kadagiti konsumidores ket kayatda a maantisiparan/maliklikan ken koma daytoy a problema.
Imbatad ti kaaduan a Vegetable Growers nga adda latta pagsayaatan iti agtultuloy a panagmulada iti nateng ket agyamyamanda iti agtultuloy a suporta ti LGU Cabugao kadagiti gannuatda a mangpapintas ti kasasaadda nga agmulmula ken agnegnegosio iti nateng.
Kabayatanna, makasarsarita met latta dagiti vegetable growers babaen kada Mrs. Ester P. Aguimbag, AT, HVCDP Coordinator ken ni Mr. Armando Azcueta, Presidente ti Vegetable Growers dagiti kaduada tapno patibkerenda ti asosasionda a nangruna iti pannakapapintas ti recording status-da kasta metten iti Financial a kasasaad ti asosasionda tapno agtultuloy a nasayud iti operasionda a kas maysa nga organisado ken pagtuladan a sektor. # (Web In-Action)
No comments:
Post a Comment