Cabugao, Ilocos Sur – Iti pannakisarita ti Web In-Action kadagiti Staff ti Pantawid Pamilyang Pilipino Program (4 Ps) ti DSWD- Cabugao Municipal Link Office ket nakunada nga agtultuloy ti pannakaangay ti Family Development Session (FDS) tapno ad-adda pay a maadalan dagiti kameng ti 4 Ps iti 33 a barangay ti ili ita a Tawen 2017.
Maibatay iti rekord ti Municipal Link, adda 1,696 a bilang ti aktibo a kameng ti 4 Ps iti 33 a barangay ken nangrugi ti programa ditoy Cabugao idi Tawen 2010.
Iti bulan ti Enero 2017, maar-aramid ti Pay-out (Over the Counter) ti aganay iti 118 a Benepisiario, segun ken ni Ms. Juliet Madriaga.
Kabayatanna, ti Topiko a maiyad-adal kadagiti 4 Ps Members ita a bulan ti Enero 2017 ket maipapan iti “Food and Nutrition.”
Segun ken ni Miss Aida S. Cueto, Municipal Focal Person ti 4 Ps a kasapulan a maawatan a nasayaat dagiti kamkameng ti 4 Ps iti husto a kaipapanan ti programa kabayatan iti 5 a tawen a pannakaipatungpalna.
Buklen dagiti agleklektiur ket dagiti Municipal Link-Cabugao Staff nga isuda Ms. Jessie Ann O. Tabut; Ms. Juliet Madriaga; Miss Aida S. Cueto ken ni Ms. Rosemarie Pespes.
Daytoy a programa ket agtultuloy a mangpasayaat ti kasasaad dagiti maseknan a kaamaan (Beneficiaries) babaen iti pannakaiyasideg kadakuada dagiti mainugot a serbisio ti Social Services babaen iti agtultuloy a panangtarabay ti Gobierno Munisipal nga idauluan ni Mayor Josh Edward S. Cobangbang. # (Web In-Action)
No comments:
Post a Comment