Cabugao, Ilocos Sur – Naangay ti Awarding para iti LGU-Cabugao iti panangipaay ti Civil Service Commission, Ilocos Sur Field Office a nagatendaran dagiti Opisiales ti Ili nga idauluan ni Mayor Josh Edward S. Cobangbang ken dagiti Department Heads iti Opisina ti LGU-Cabugao agraman dagiti kameng ti Sangguniang Bayan ti ili kalpasan ti Flag Raising Ceremony iti Enero 9, 2017 iti sango ti Rizal Barangay Hall, Brgy. Rizal, Cabugao, Ilocos Sur.
Maibasar iti linaon ti Pammadayaw ket maibilang ti LGU-Cabugao kadagiti Top 6 (5 LGUs ken 1 a Unibersidad) a sanga ti Gobierno iti intero nga Ilocos Sur a napadayawan iti Certificate of Recognition manipud iti Civil Service Commission, Region 01, Maturity Level 2 in Recruitment, and Placement Performance Management System and Rewards & Recognition a nagresulta iti panagdur-as ti gapuanan ken epektibo a pannakaited ti napintas a serbisio-publiko para iti kaaduan.
Iti umuna a parte ti seremonia, inyawat ni Ms. Cecilia S. Bareng, Hepe ti CSC Ilocos Sur Field Office ken ni Mayor Josh Edward S. Cobangbang ti Award a binayabay da SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Jayhan Charisma Alcid-Tan; ken ni SBM Josefina S. Vallejo; Opisiales ti PNP-Cabugao ken dagiti Department Heads ti LGU-Cabugao iti imatang ti Pamilia-LGU.
Iti panagsarita ti CSC Provincial Director, impeksana ti panangapresiarna iti agtultuloy a napintas a gapuanan ti HRMO-Cabugao nga imatonan ni Miss Teresita “Mimi” S. Sison a nagkunaan pay ti Hepe a nagaget ti HRM Officer kasta metten iti “Leadership by Example” a liderato ni Mayor Josh Edward S. Cobangbang iti LGU-Cabugao.
Iti Acceptance Message ni Mayor Josh Edward S. Cobangbang, dinakamatna ti pateg iti agtultuloy a panagkakammayet dagiti opisina kasta metten dagiti mangiturturong nga Opisiales ti Gobierno Lokal iti pannakagun-od ti Munisipio daytoy a pammadayaw iti CSC.
Nagyaman ti Local Chief Executive iti CSC Provincial Director agraman dagiti nagatendar kadaytoy a pannakabigbig ti Munisipio iti nagud-odna manen a pammadayaw.
Sakbayna, napadayawan iti kallabes ti LGU-Cabugao manipud iti CSC Region 01 iti Award of the Revalidated Accreditation Program babaen iti panangyawat ni Ms. Cecilia S. Bareng, CSC Ilocos Sur Field Office Chief ken ni Mayor Edgardo S. Cobangbang, Jr. a nakakitaan a maibilang ti LGU-Cabugao kadagiti 11 nga LGUs ti Ilocos Sur a nakapasa iti pagrukodan a panagtungpal iti CSC iti napintas a pannakataming ti pagsaadan dagiti empleado ken dadaulo ti opisina iti Gobierno Lokal. # (Web In-Action)
No comments:
Post a Comment