Friday, January 13, 2017

MAIS A MAIMULA ITI DRY SEASON, MAKATULONG

Cabugao, Ilocos Sur – Maysa kadagiti napateg a gay-at ita ti Gobierno Munisipal nga idauluan ni Mayor Josh Edward S. Cobangbang  ket  iti pannakatakuat  dagiti maipanawen, nabiit,  ken  na-presio  a klase ti maimula dagiti mannalon nangruna iti “off-season”  babaen iti panangipatungpal ti DA-LGU iti kada panagmumula tapno manayonan ti matgedan dagiti mannalon ken mapapintas ti presio iti balanse a kaadu ti produksion.

Maysa ti mais a nabiit, kasapulan iti merkado ken eco-friendly a mairagragpin   a maimula ditoy Ilokos.  Ti Agri-Pinoy Corn Program  ket  naipatpatungpal ti Departamento ti Agrikultura (DA) ken babaen  ti DA-LGU ket adda latta deretso nga agmulmula ti yellow ken white corn kadagiti kaaduan  a  Barangay ti ili a Cabugao, Ilocos Sur. 

Umabot  itay 2016 ti   272  ektaria iti namulaan iti amarilio a mais ken 27   ektaria ti  puraw ti klasena a mais iti Dry Season 2015 - 2016, segun ken ni Mr. Nerio S. Daproza, AT, DA-LGU Cabugao malaksid pay kadagiti nagmula iti bangkag iti Wet Season 2016 (Hunio- Nobiembre).

Segun ken ni Municipal Agriculturist Robert S. Savella a nupay maipangruna met latta ti panagmulada iti tabako  iti Dry Season (Nobiembre-Mayo) ta nalawlawa ti mamulaan ti tabako iti 2,271 ektaria itay kallabes   a Tawen 2016, dandanin makipatas ti kalawa ti mamulaan ti mais iti pagay nupay ad-adu latta ti tabako. Innayon ti MAO a napintas daytoy a pannakabalanse  ken  mapaggigidiat ti maimula iti umabot iti 2, 271 ektaria a kalawa ti mamulmulaan/mataltalon a daga iti intero nga ili ti Cabugao.

Naaramid  ti FFS-Demo-Farm ti mais  kadagiti mayataday a lokasion iti Cabugao, Ilocos Sur ken manamnama a naikurri dagiti naadalda dagiti nagpartisipar iti Farmers’ Field School Program  ti DA-RFO 1  kadagiti barangay  a timmulong a nangisayangkat ti programa ti DA-LGU.

Malaksid kadagiti Corn Traders a mangpapigsa ti merkado ken industria ti mais, adda pay  ti  agtultuloy a programa ti Provincial Government a naipatungpal iti kada ili ti Probinsia ket mapagtalinaed ti Floor Price a P12/kada kilo a makatulong unay kadagiti mannalon ken karkardayo a pakalugianda. 

Nupay kasta, ti puraw a mais ket saan a nakadadanag ta nataray a lakuen ta para pay iti konsumo ti kaaduan.

Innayon ni Mr. Daproza  a maysa a prayoridad ti Gobierno Probinsial ken Lokal  iti panagpamula ti mais agsipud ta nakasapulan iti industria ti panagtaraken ti baboy ken manok ken mabalin a pagsulnit ti mais  a pagtaraon no bumassit ti suplay ti bagas. # (Web In-Action)

No comments:

Post a Comment