Cabugao, Ilocos Sur – Mangrugi iti Enero 9, 2017, maar-aramid ti sangsangkamaysa a pagsakadaan kadagiti maiyannatup a papeles sakbay a maala ti Business Permit a gun-oden dagiti nadumaduma nga agtagikua ti establisimiento iti negosio ditoy Munisipalidad a pakairamanan idiay NISTC Public Market.
Maawagan iti Business One Stop Shop wenno BOSS iti wagas a panagala ti Business Permit ita a Tawen 2017 ditoy LGU Cabugao.
Naiplastar ti napagsisilpo a lamisaan iti uneg ti pasdek ti ECCD a pakakitaan kadagiti pannakabagi ti nadumaduma a Departamento ti Opisina ti LGU kasta metten dagiti dadduma pay nga Ahensia iti salinong ti LGU Cabugao kas iti Bureau of Fire Protection (BFP); PNP; SSS; ken RHU a pakaiprosesuan dagiti papeles sakbay a magun-od ti permit
ti negosio.
Daytoy nga addang ken wagas ket maar-aramid iti umuna a bulan ti kada Tawen tapno maipadaras ti panagsakada dagiti umili a maseknan iti business permit.
Maibatay iti pakaammo ni Mrs. Racquel S. Ancheta, License Officer II ken General Services Officer (GSO) iti Munisipio, maaramid manen ti panagpabaro iti Business Permit a kasapulan dagiti maseknan nga agnegnegosio sakbay nga agoperarda kadagiti negosioda iti Tawen 2017. # (Web In-Action)
No comments:
Post a Comment