Tuesday, January 24, 2017

OPERATION TIMBANG PROGRAM TI MNAO, AGTULTULOY

Cabugao, Ilocos Sur – Segun ken ni Ms. Jeannete Garcia, Municipal Nutrition Action Officer nga agtultuloy latta ti “Operation Timbang Program”  kadagiti ubbing iti 33 a barangay ti ili a Cabugao, Ilocos Sur babaen kadagiti Barangay Nutrition Scholars (BNS)  a tultulongan dagiti Barangay Health Workers (BHWs) tapno madeterminar iti pagdurdur-asan dagiti programa/aktibidades  a maipatpatungpal iti pakaseknan ti pannakataraon, pannakataming ti salun-at ken panangsursuro kadagiti nagannak a mangtaripato iti pamiliada para iti panangpakanda iti nasustansia ken napintas a panangasikaso ti salun-atda iti inaldaw babaen iti panangbasada ti “Ang Inyong Nutri-Guide”  a libro nga inted ti Department of Health (DOH) ken ti Philippine National Nutrition Council.

Innayon ni Ms. Garcia nga itantandudoda met iti napintas a koordinasion kadagiti Opisiales ti Barangay tapno mapasayaatda ti trabahoda iti uneg ti barangay ken Purok.

Insupusop ni Ms. Garcia nga isuda nga adda iti Secretariat ti Municipal Nutrition Committee ket napintas ti koordinasion ken pannakikammayetda  kadagiti pannakabagi ti MSWDO, RHU, DepED ken ti LGU-Cabugao iti agtultuloy a  pannakaipatungpal ti programa iti Nutrition Sector iti Munisipalidad.

Dagitoy nga aksion ken inisiatiba ket paset iti programa a panangpasayaat ti LGU-Cabugao nga idauluan ni Mayor Josh Edward S. Cobangbang iti serbisio ti nutrision nga itden ti Munisipio nangruna kadagiti away ken barangay tapno agtultuloy a mamantener ti napintas a salun-at iti sapasap.  # (Web In-Action)

No comments:

Post a Comment