Tuesday, January 17, 2017

CLAIMANTS TI PCIC, MABAYADAN DAGITI NADIDIGRA A MULADA A PAGAY

Cabugao, Ilocos Sur  - Agtinnulong ti DA- Philippine Crop Insurance Corporation (PCIC)  ken dagiti  Staff ti DA-LGU Cabugao nga idauluan ni Municipal Agriculturist  Robert S. Savella  a mangited ti bayad  dagiti mannalon a nadidigraan ti mulada a pagay gapu iti idadaliasat ti  Bagyo Karen ken Bagyo Lawin idi Oktubre 19-20 a masakupan iti Wet Season 2016 (Hunio-Nobiembre).



Nagatendar ni Mayor Josh Edward S. Cobangbang iti pannakabayad ti “ imdemnities” dagiti mannalon babaen kadagiti pannakabagi ti PCIC Region 1  iti Rizal Park, Barangay Rizal, Cabugao, Ilocos Sur. Bimmayabay met dagiti Staff ti DA-LGU nga idauluan ni Municipal Agriculturist Robert S. Savella.



Impeksa ni Mayor Josh Edward ti panagyamanna iti PCIC ken iti DA-LGU Staff iti an-anusda a nangtaming iti pakaseknan dagiti nadidigraan a mannalon iti Typhoon Karen ken Bagyo Lawin ket no kaskasano ket masulnitan ti gastos ken bannogda iti panagmulada itay kallabes a Wet Season 2016. Pinalagipan pay ti Ama ti Ili dagiti mannalon a kasapulan a ma-insure dagiti mulada tapno adda latta nakananama a pangipasublianda iti gastosda no madidigraan dagiti mulada.



Kanaig daytoy, impadamag ni Mr. Savella nga adda  55 a bilang ti mannalon nga umawat iti P288,616.00 nga ited ti Philippine Crop Insurance Corporation (PCIC)  ita nga  Enero 17, 2017 iti sango ti Rizal Barangay Hall, Brgy. Rizal, Cabugao, Ilocos Sur. 




Innayon ti MAO nga  awan ti rimsua a problema iti panangaksion ti PCIC kadagiti pakaseknan dagiti mannalon itay Dry Season 2015-2016 (Disiembre-Mayo) ta nabayadan amin a “crop damages” a napabisita ken naipinal babaen iti panagtitinnulong dagiti maseknan a mannalon, Staff ti DA-LGU ken dagiti Adjuster ti PCIC nga adda iti babaen ti Departamento ti Agrikultura (DA).



Dagitoy nga aksion ken inisiatiba ket resulta iti nakammayet  a programa ti Gobierno Munisipal nga idauluan ni Mayor Josh Edward S. Cobangbang ken iti DA- PCIC  tapno matulongan ti kasasaad dagiti mannalon a naapektaran ti mulada iti limmabas a dawel dagiti bagyo. # (Web In-Action)

No comments:

Post a Comment