Tuesday, January 10, 2017

LEARNING/TRAINING SITE TI DA-ATI, NALUKTAN DITOY CABUGAO!

Cabugao, Ilocos Sur – Kangrunaan a panggep ti pannakalukat  ti Practical Learning Site for Practical Agriculture iti Siababa’s Farm, Brgy. Sagayaden, Cabugao, Ilocos Sur ket iti pannakalukat ti maikatlo a Learning /Training Site ti Agriculture Training Institute (ATI) a sanga ti Department of Agriculture (DA)-Regional Field Office, San Fernando City, La Union ditoy Cabugao, Ilocos Sur. 


Umuna idiay Suyo, Ilocos Sur; maikadua idiay Provincial Jail Compound, Vigan City ken maikatlo ditoy Cabugao, Ilocos Sur babaen iti pannakapili ni Mr. Bonifacio S. Siababa, Farm Owner/Manager ti Siababa’s Farm ken Presidente ti Ilocos Sur Rice Growers Association a mangtarawidwid iti proyekto ti DA-ATI a mangtulong kadagiti mannalon ditoy a deppaar.

Iti Launching Program iti Siababa’s Farm Stage a naangay iti  Enero 10, 2017, nasangaili dagiti Opisiales ti DA-ATI nga idauluan ni Dr. Rogelio C. Evangelista, Training Center Superintendent II; Dr. Melinda F. Mangabat, Training Center Superintendent 1; OPAG-Ilocos Sur nga idauluan ni Provincial Agriculturist Constante B. Botacion, Jr.; DA-LGU Cabugao nga idauluan ni Municipal Agriculturist Robert S. Savella; Opisiales ti Barangay nga idauluan ni Brgy. Captain Virgilio S. Piros ken dagiti lumugar; Seed  Growers ti nadumaduma nga ili ken Konsehales ti Ili nga isuda SBM Danny Q. Gazmen a nangibagi ken ni SBM Atty. Randy Baniaga G. Kinaud, Committee Chairman on Agriculture ken ni SBM Vicky S. Serna, nangibagi ken ni Mayor Josh Edward S. Cobangbang.

Iti Mensahe da SBM Gazmen ken ni SBM Serna, pinagyamananda ti DA-ATI, OPAG ken ti Siababa’s Farm ta naipasdek daytoy a training site dagiti aktibidades ti agrikultura ken OJT ditoy ili ti Cabugao ket dakkel a katulongan ti programa ti agrikultura iti Gobierno Munisipal nga idauluan ni Mayor Josh Edward S. Cobangbang daytoy a gannuat a mangpadur-as ti kaammuan dagiti mannalon ken pangrugianda a proyekto a mangpasayaat pay iti kasasaadda. 


Impeksa met ni Mr. Bonifacio S. Siababa ti Acceptance and Commitment Message-na ken naited kenkuana ti Certificate of Accreditation a kas Learning Site ti ATI ken nai-award kenkuana ti Tseke nga aggatad iti P80,000 a kas pangrugian ti proyekto.

Pinagyamanan met ni Municipal Agriculturist Robert S. Savella ti  LGU-Cabugao nga idauluan ni Mayor Josh Edward S. Cobangbang iti agtultuloy a panangsuportana ti programa ti Agrikultura  kasta metten  kadagiti Opisiales ti ATI, DA, OPAG, Barangay Officials ti Sagayaden ken iti Siababa’s Farm Management ta  naballigi iti pannakaiyusuat daytoy a proyekto.

Sangsangkamaysa ti anag ti mensahe dagiti Opisiales  a nangdayaw iti pammasingked ni Mr. Siababa a ditoy lugarda iti pakaipasdekan ti pagadalan dagiti mannalon kadagiti kabaruanan a wagas ti panagmulmula nga iyimplimentar manipud iti Nasional, Rehional ken iti Probinsial a benneg ti DA. # (Web In-Action)

No comments:

Post a Comment