Cabugao, Ilocos Sur – Iti pannaki-amad ti Web In-Action ken ni Municipal Agriculturist Robert S. Savella ket imbagana nga agtultuloy nga idauluan ni Dr. Melvin G. Castro, DVM, Municipal Livestock Coordinator ti DA-LGU Cabugao iti papanda panagbakuna ti pangkontra iti agraraira a sakit dagiti dadakkel nga animales nga isu daytoy ti “Hemorrhagic Septicemia (HS)”, maysa a kita ti nakaro a sakit a kumpet ken rumsua kadagiti dadakkel nga ayup. Isuda iti benneg ti Livestock Office ti mangidanon ti serbisio kadagiti 33 a barangay ti ili tapno masigud a maprebentaran dagiti rumsua a sakit ti animales.
Malaksid iti panagbakuna, maikkanda pay iti Vitamin B Complex and Deworming (VALBAZEN) dagiti maagasan nga ayup tapno agtalinaedda a naandur ken natalingenngen ti kasasaadda nga agdakkel.
Innayon ni Dr. Castro a makikokoordinarda kadagiti Opisiales iti papananda a barangay ta kabaelanda a mobilisaren a daras dagiti adda ayup ken dinguenna tapno matamingda iti mammaminsan nga eskediul.
Malaksid iti ragup a kas iti grupo/barangay a panagbakunada ket maangay met latta iti indibidual a wagas nangruna kadagiti adda sakit ti dinguen ken ayupda a kasapulan pay a makita ken maagasan.
Dagitoy nga aksion ken inisiatiba ket resulta iti agtultuloy a programa ti Animal Care and Disease Prevention ti Gobierno Munisipal nga idauluan ni Mayor Josh Edward S. Cobangbang tapno naan-anay a maidur-as ti livestock sector babaen iti pannakapapigsa ti panagtaraken kadagiti ayup a katulongan iti panagmulmula a pamastrekan dagiti mannalon ken umili. # (Web In-Action)
No comments:
Post a Comment