Cabugao, Ilocos Sur – Iti interview ken ni Mrs. Norma S. Bertumen, Market Supervisor iti Opisinana iti NISTC Public Market itay nabiit, kinunana nga itultuloyda nga ited ti napintas a pannakaipaay ti serbisio kadagiti aggatang/aglaklako babaen kadagiti sumaganad:
1. Agtultuloy a pannakalinis a nasayaat ti las-ud ti Tiendaan (NISTC Public Market) ken iti itutulongda a mangbunag kadagiti dadduma pay a wara nangruna kadagiti selopin (non-biodegradable materials) ket agtultuloy nga isayangkat dagiti Personnel ti NISTC Public Market a tumulong nga agikkat kadagiti rugit.
2. Maar-aramid iti pannaka- “Flushing” ti basar ken stalls iti paglakuan ti ikan ken karne (mamindua ti makalawas) ken maasikaso pay ti septic tank.
3. Maar-aramid ti inspeksion kadagiti ambulant vendors babaen iti panangpalagip ti Public Sanitary Inspector ti LGU-Cabugao kadagiti Food Handlers nga aglaklako iti ikub ti Tiendaan.
4. Agtultuloy met ti koordinasion ti Opisina ti MENRO-LGU Cabugao ken ni Mrs. Bertumen iti patinayon a pannakadalus ti agsumbangir ti Kalsada Nasional iti batog ti Tiendaan agraman kadagiti drainages tapno agtultuloy a nasigo ti sanitasion ken nasalun-at nga aglawlaw ti NISTC Public Market a para met laeng iti sapasap.
5. Adda regular a koordinasionda iti Department of Trade and Industry (DTI)-Vigan City iti pakaseknan iti presio ken pagkiluan iti Tiendaan. Naipasdek ti masasao a: “Timbangan ng Bayan” iti dua a disso, ti kanatengan ken kakarnean/kaikanan tapno adda pangpasingkedan dagiti aggatgatang no umisu met laeng ti kilo iti nagatangda ken agpatingga laeng iti 15 Kilograms ti pagkiluan a libre.
Malaksid iti pannakamonitor iti presio, pagkiluan, pasilidades ti tiendaan ket maipampamaysa iti pannakamantener ti kinadalus ti uneg ken aglikmut ti tiendaan nangruna kadagiti Comfort Rooms (CRs).
Nupay kasta, agtultuloy ti umay makitienda uray pay kadagiti agindeg iti kabangibang nga ili nangruna a mangpaadu ti malakuan dagiti adda iti puestona iti Tiendaan.
Dagitoy nga agtultuloy a panagsayaat ti Tiendaan ket resulta iti nasamay a Direktiba ti Munisipio nga idauluan ni Mayor Josh Edward S. Cobangbang ken ipatungpal ti Management Staff iti NISTC Public Market. # (Web In-Action)
No comments:
Post a Comment