Cabugao, Ilocos Sur – Naaramid ti pannakaiyallawat tit Tseke nga aggatad ti 2.6 Million kadagiti 17 nga Asosasion ti mangngalap a mangbukel iti Cabugao Federation of Fishermen and Vendors Association nga idauluan ni Mr. Magno Carbonel, Federated President idi Setiembre 15, 2017 iti pasdek ti Early Childhood Care Development Center (ECCD), Brgy. Rizal, Cabugao, Ilocos Sur.
Mismo a ni Mayor Josh Edward S. Cobangbang ti nangidaulo a kaduana ni Federated President Magno Carbonel iti pannakaiyawat ti nadakamat a Tseke iti imatang ni Diputado DV Savellano ti First District, Ilocos Sur ken dagiti Opisiales ti Department of Labor and Employment (DOLE); Konsehales ti ili; Opisiales ti Pederasion ken ti Asosasion ken iti Municipal Fisheries Office nga idauluan ni Municipal Fisheries Coordinator Nereo S. Daproza.
Segun ken ni Municipal Fisheries Coordinator Nereo S. Daproza a nagun-od ti nadakamat a pundo a para iti proyekto ti Gillnet ken Payao babaen iti naregta a panagkalikagum ti maseknan a Pederasion ti mangngalap ken iti panangilungalong ti LGU-Cabugao iti Department of Labor and Employment (DOLE).
Kabayatanna, impeksa met dagiti Opisiales ti Pederasion a mabenepisiaran kadaytoy iti nasged a panagyamanda iti LGU-Cabugao ken iti Ahensia ti DOLE iti pannakaruk-at ti nadakamat a gatad kasta metten nga agyamanda met iti agtultuloy a panangtarabay ti LGU-Cabugao nga idauluan ni Mayor Josh Edward S. Cobangbang iti pannakagun-odda iti kalikagumda. # (Web In-Action)
No comments:
Post a Comment