Cabugao, Ilocos Sur – Naaramid ti Blessing & Inauguration ti naipasdek a baro a rangtay a mamagkamang iti Poblasion iti pito a barangay iti daya ti ili a kas iti Barangay Alina-ay; Brgy. Sisim, Brgy. Catucdaan, Brgy. Cael-layan, Brgy. Brgy. Maradodon; Brgy. Turod Patac ken ti Barangay Aragan.
Binayabay ken kadua ni Mayor Josh Edward S. Cobangbang ni Former Congressman Ronald V. Singson a nanggetteng ti ribbon ken kangrunaan a nasangaili iti nasao nga inauguration ceremonies.
Naisaruno ti pannakaidaton ti Kararag babaen ken ni Rev. Fr. Felix A. Costales iti imatang dagiti sangaili, Opisiales ti Barangay ken iti Ili kasta metten dagiti lumugar iti Barangay Alina-ay sa binendisionan ti Padi iti stretch ti baro a rangtay.
Naaramid ti Ababa a programa iti sirok ti kaykayo iti amiananen ti baro a rangtay.
Kalpasan a makanta ti Pambansang Awit ken iti Cabugao Hymn, linuktan ni SBM Danny Q. Gazmen ti Programa. Kimmablaaw ken nagyaman ti Konsehal ket bininsana ti pateg iti pannakaipasdek ti baro a rangtay babaen iti panangirubuat da Former Congressman Ronald V. Singson ken ni Former Mayor Edgardo “Ediboy” S. Cobangbang, Jr. iti napalabas nga administrasionda. Iti adu a dekada a nairubuat iti pannakaitrabaho ti baro ken kongkreto a rangtay ket nairugi ken naileppas met laengen iti las-ud ti panagtakem ni Mayor Josh Edward S. Cobangbang.
Simmaganad ti panagsarita ni Brgy. Aragan Punong Barangay Modesto P. Ronque. Apaman a nakakablaaw ken nagyaman ket bininsana ti pakasaritaan ti daan a rangtay nga uray pay iti adu a termino a panagkapitanna ket saan a napabaro ti nadakamat a rangtay ket eksakto iti naipanagan babaen iti Resolusion-da iti Konseho Munisipal iti naipanagan a "Rangtay Balligi" ta napagballigian dagiti pannubok ket nagbalin a Rangtay Balligi iti naganen iti dati a Quezon-Alina-ay Bridge. Innayon ni Kapitan Ronque a mataginayon daytoy a batonlagip a gapuanan iti maysa a nakapatpateg a gayyem dagiti umili ti Cabugao nga isu ni Former Congressman Ronald V. Singson agraman ni Former Mayor Edgardo "Ediboy" S. Cobangbang ta iti pannakaibanag ti dakkel a pundo a nagun-od ti ili ket naaramid a naiserbi para iti pagimbagan ken pagnam-ayan dagiti umili ken aminen a dumalan kadaytoy a kabarbaro a rangtay iti Brgy. Alina-ay.
Iti panagsarita ni Diputado Ronald V. Singson, kunana a saan a mauma a mangay-ayat ti ili a Cabugao isu nga impanna ditoy ti umdas a gatad iti panagtakemna a nakabuklan ti dakkel a proyekto a nagnaminganda kadagiti Taga-Cabugao iiti liderato ni Former Mayor Edgardo “Ediboy” S. Cobangbang, Jr.
Ket nagbukel dayta a proyekto nga isu daytoy ita a mainagoraran a Rangtay Balligi iti Brgy. Alina-ay, Cabugao, Ilocos Sur iti kaaldawan ti Setiembre 26, 2017.
Naudi a nag-Mensahe ni Mayor Josh Edward S. Cobangbang ket kunana a nakapatpateg daytoy a nabangon a proyekto ta adu ti mabenepisiaran. Pinagyamanan ti Ama ti Ili iti lungalong ni Nag-Diputado Ronald V. Singson ken ni Nag-Mayor Ediboy Cobangbang, Jr. ta inrubuatda daytoy a nakadakdakkel iti iyegna a pagnam-ayan dagiti umili ti Cabugao, Ilocos Sur ken iti sapasap a dumalan. Innayon pay ni Mayor Josh Edward a maysa a mapagwadan a Congressman ni Nag-Diputado Ronald V. Singson ta un-unaenna iti pagsayaatan ti kaaduan.
Nakipaset dagiti Kapitanes ti barangay; lumugar iti Barangay Ali-naay ken dagiti kabangibangna a mabenepisiaran; dagiti kameng ti Konseho Munisipal nga isuda SBM Danny Q. Gazmen; SBM Dr. Jemaima S. Tan-Yee; SBM Josefina S. Vallejo; SBM Atty. Randy Baniaga G. Kinaud; ABC President Thaddeus U. Soller; Former Mayor Edgardo “Ediboy” S. Cobangbang, Jr. ken ni Municipal Engineer Crescencio Marcos C. Formoso. Kasta metten dagiti taga-Media. # (Web In-Action)
No comments:
Post a Comment