NAPALAWA TI NATALON GAPU ITI NABUSLON A TUDO

Cabugao, Ilocos Sur – Iti panakaisar-ong ti Web In-Action kadagiti barangay ti Munisipalidad, naammuan kadagiti mannalon nga iti panagbuslon ti tudo iti limmabas a Bagyo ti nangipaay ti kasapulan tapno agtan-ay ita dagiti naimula a pagay iti  Wet Season 2017 (Hunio-Nobiembre) nga agdagup iti 2,246.5 a bilang ti Ektaria a natalon, segun ken ni Municipal Rice Program Coordinator Nathaniel B. Galamgam, AT. 

Kaaduan ita ti nanam-ayan iti kaadda ti naited a nagrugian a bukel ken ganagan babaen iti programa ti Gobierno Munisipal ken ti DA-RFO 1  a nausar iti panagbunubonda ken kasta metten a dakkel a katulonganda dagiti nagun-odda a Farm Machineries  &  Farm Implements.

Maibasar iti rekord ti DA-LGU, immabot ti 4,600 a bilang ti mannalon a nangbukel iti  35 a rehistrado nga  asosasion ti mannalon iti naikkan iti pamalpalatpatan iti Cropping Calendar & Pattern of Planting iti Wet Season 2017  babaen iti naaramid a meeting sakbay iti nasaknap a panagbunubonda. Daytoy  a tignay ket  kankanayon nga ar-aramiden dagiti Staff ti DA-LGU nga idauluan ni Municipal Agriculturist Robert S. Savella.

Iti kallabes a Wet Season 2016, natun-oyan ti 1, 283 ektaria a  natalon iti rainfed area ken 
umabot met iti 971 ektaria iti irrigated area ket nagkair nga 
2,204 ektaria  ti natalon  iti intero a Munisipalidad. 

Kanaig daytoy, nailunsad iti Wet Season 2017 dagiti Municipal Techno-Demo Farm kadagiti estratehiko a lugar; Seed Production ken  kasta metten iti Farmers Field School (FFS)  in Rice Production kadagiti estratehiko a disso ti barangay ti ili. Dagitoy a demonstration area iti panagtalon ket tinawen a maar-aramid a pagtuladan dagiti mannalon a pagtitinnulongan nga isayangkat dagiti Ahensia a kas iti DA-RFO 1; OPAG-Ilocos Sur; Agriculture Training Institute (ATI)- Region 1;  Ilocos Norte Research Experimental Center (INREC-Batac)  ken iti LGU-Cabugao nga idauluan ni Mayor Josh Edward S. Cobangbang.

Dagitoy nga aksion ken inisiatiba ket gubuay iti napintek a programa ti Gobierno Munisipal nga idauluan ni Mayor Josh Edward S. Cobangbang tapno makomplementaran iti regta dagiti mannalon nga agpataud iti umanay a suplay a pagtaraon dagiti umili. # (Web In-Action)