FARMER’S FIELD SCHOOL, BARO A KITA TI ADAL NGA ITED TI DA-RFU-ATI

Cabugao, Ilocos Sur – Naangay ti umuna a miting dagiti mannalon nga agadal iti Farmer’s Field School  nga isayangkat ti DA-LGU Cabugao ken DA-Provincial, kasta met iti  DARFU1 - ATI-Sta. Barbara, Pangasinan  babaen ti panangaprobar ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mairubuat ditoy ili a Cabugao daytoy a programa a mangitag-ay ti kasasaad dagiti mannalon.

Ti FFS ket espesial ken baro a programa ita ti Gobierno Nasional nga ipakat ti DA iti LGU’s a makapatas  ti pagrukodan tapno umagpang ti pakabuklan a kasasaad dagiti mannalon babaen ti apit, kaammuan  ken kasasaad  ti panagbiagda.

Napili ti Barangay Pug-os a pakaipakatan daytoy a programa iti Munisipalidad. Aganay a 1,000 sq. meters ti disso ti “learning field” a pakaimulaan ti TH-82 Hybrid Rice. Uppat a treatment (sag-250 sq. meters) ti aktual a pakaiyadalan ti baro a  teknolohia a pagpartisiparan ti 48 a mannalon manipud Brgy. Pug-os ken “special participation” ti sumagmamano a  mannalon ti Brgys. Maradodon ken Nagsantaan, segun ken ni Mr. Nereo S. Daproza, Municipal Rice Program Coordinator. 

Mangrugi ti bukel a maitukit agingga a  bukel a maapit daytoy a panagadal. Kada bigat ti Huebes, 2 nga oras iti aktual sa teoria idiay Learning Center-da  a pagyanan dagiti ag-session a mannalon. Ni Mr. Robert S. Savella ti Lead Facilitator ken tumulong ti DA-LGU Staff,  DA Provincial Office  ken DA-ATI, Sta. Barbara, Pangasinan.

Ited ti DA-ATI dagiti mausar iti panagadal kas iti papel, lapis, ballpen, notebook, ID, manila paper ken dadduma pay a kasapulan ti session. Umabot ti 16  a lawas a kaibatogan ti 4 a bulan ti panagbasada. Kalpasan daytoy, maikkanda ti pakakitaan nga isuda ket nagadalda a  “Teknisian ti Pagay” ken pribilehioda ti maikkan ti Lakbay Aral ken kasapulanda a proyekto nga ited daytoy a programa ni P-Noy.

Innayon ni Daproza a manamnama nga agballigi daytoy a gannuat gapu iti nasged  a suporta ni Mayor Ediboy ken mayallatiwto kadagiti dadduma a barangay nga umar-araraw iti kastoy a pannakamuli dagiti mannalon. # (Web In-Action)