Monday, June 18, 2012

SEKTOR TI BABBAI TI BRGY. ARAGAN, SANAYEN TI DARPO-MARO

Cabugao, Ilocos Sur – Naaramid ita nga aldaw, Hunio 18, 2012 ti umuna iti tallo nga aldaw (Hunio 18-20, 2012) a panagsanay dagiti babbai iti Barangay Aragan, Cabugao,Ilocos Sur iti “Paper Waste Material Recycling” babaen ti panangiwayat ti Department of Agrarian Reform-Provincial Office ken  DAR-MARO Cabugao a  tarabayen ken suportaran  ti Gobierno Munisipal nga idauluan ni Mayor Edgardo S. Cobangbang, Jr.

Immuna a naluktan ti panagsanay babaen iti ababa a kararag nga indauluan  ti RIC Member. Nagsarita ni Ms. Marie  Grace Versoza, Training Officer ti DARPO ket impeksana ti panagyamanda  iti suporta ni Mayor Ediboy iti panagturongda  iti Opisina ti Mayor maipapan  kadaytoy a panagsanay dagiti babbai tapno matulongan ti kasasaadda babaen iti maadalda a wagas ti pagkakitaan nga ited ti DAR.

Innayon ti Training Officer a masustener koma daytoy a panagsanay ken adda koma “impact” iti pagbiagan ti kababaian ditoy a barangay.

Simmaruno a nagsarita ni Mr. Vic Ascano, Trainor ken Administrative Officer ti DARPO-Ilocos Sur. Kunana a bassit la ti maipuonan kadaytoy a panagsanay ta kaaduan nga usado a    papel ti materiales a mausar ken saan a problema ti paglakuan ti produkto. Innayonna a makamkamat ita  ti maisuplay nga ar-aramidenda isu a napintas a maikaadu ti maaramid tapno malitupan ti adu nga order.

Maibilang ti Asiamall, SM Megamall, Heritage City, Baluarte dagiti outlets  ti naaramidda  ken kaaduan a Foreigners ti kustomerda.

Buklen ti DAR-Provincial Office da Ms. Marie Grace Versoza, Training Officer; Ms. Esterlin Navarro, Marketing Officer; Mr. Vic Ascano, Trainor, Harold Impelido, Driver/Staff.

Nakibinnulig met da Dr. Elizabeth S. Pablico, DPA, Caretaker-MARO Cabugao; Mr. Teodoro P. Par ken   Mr. Orlando Tanda, agpada a Personnel ti MARO. 

Manamnama a makaaramidda ti adu a gapuananda iti tallo nga aldaw a panagsanayda. # (Web In-Action) 

No comments:

Post a Comment