Wednesday, June 13, 2012

NAISALUMINA A PANNAKASELEBRAR TI INDEPENDENCE DAY

Cabugao, Ilocos Sur – Naselebraran ti Independence Day babaen ti panangiyuna  ti LGU Cabugao nga idauluan ni Mayor Edgardo “Ediboy” S. Cobangbang, Jr. idi Hunio 12, 2012 iti Cabugao Central Park (CCP), Brgy. Bonifacio, Cabugao, Ilocos Sur.

Naangay dagiti aktibidades a nangparambak ti selebrasion kas iti Kalayaan Fun Run a nairubuat iti 4:00 A.M. ti Hunio 12, 2012 a nagpartisiparan dagiti empleados ti LGU, Gobierno Nasional ken estudiante.

Naaramid pay ti Nasantuan a Misa a naidaton iti selebrasion nga inatendaran dagiti umili,  opisiales ken kameng  ti  nadumaduma nga Opisina ken Ahensia.

Naisaganad ti Dance Parade a nagpartisiparan dagiti Cabugao District Streetdancers a naaramid  manipud iti Munisipio agingga iti Cabugao Central Park (CCP).

Naisa ti Nailian a Bandera, nakanta ti  patriotic song ken naaramid ti  showdown ti streetdancers.
Naggigiddan met a naisagutan ti sabong iti sakaanan  dagiti  Bannuar a pakaibilangan ti nagsaadan ti monumento da Jose Rizal, Andres Bonifacio, Eustaquio Baclig ken bust ni nag-Presidente Manuel L. Quezon nga indauluan dagiti opisiales ti Gobierno Munisipal.

Anag ti Mensahe ni Mayor Ediboy ti naimpusuan a  panagyamanna kadagiti umili a nakipaset kadaytoy a selebrasion ti Aldaw ti Wayawaya iti laksid ti panagtudtudona. Kas iti napalabas nga okasion ti ili a kastoy ti paniempona, imbilang ti Ama ti Ili  a paset ti  bendision daytoy iti ngato .

Kalpasan ti programa, naangay ti indigeneous games a nagpartisiparan dagiti empleado ken estudiante kas iti Palo Sebo, Patintero, Luksong Tinik, Tumbang Preso ken Hulihan ng biik.

Naigannuat pay ti pannakaimula ti pinuon ti kayo (seedlings) iti igid ti Karayan Cabugao.
Indauluan da  Mayor Ediboy ken Vice Mayor Danny Q. Gazmen agraman dagiti kameng ti Sangguniang Bayan dagiti umili iti pannakaaramid ti naballigi a selebrasion ti Aldaw ti Wayawaya.  # (Web In-Action)

No comments:

Post a Comment