Tuesday, June 11, 2013

FDS TI BRGY. QUEZON, BRGY. BONIFACIO, NAANGAY ITI MUNISIPIO

Cabugao, Ilocos Sur – Naangay ti Family Development Session (FDS) dagiti kameng ti 4 P’s (Pantawid Pamilyang Pilipino Program) iti Brgy. Quezon ken Brgy. Bonifacio, Cabugao, Ilocos Sur idi Hunio 10, 2013 iti Municipal Conference Hall, Cabugao, Ilocos Sur.

Naglektiur ni  Ms. Jessie Ann Tabut, Municipal Link maipapan iti programa ti 4 P’s ken natratar pay dagiti pakaseknan ti tunggal maysa a kameng ken na-update ti rekordda tapno mayataday iti direksion ti programa.

Nagatendar met dagiti Personnel ti  RN-Heals iti RHU ket inlawlawagda dagiti panggep ken benepisio ti programa ti Philhealth a makatulong  iti pakaseknan ti salun-at dagiti ubbing ken pamiliada  tapno napintas ti panaglayag ti programa para iti salun-at dagiti kameng.

Dagitoy nga aksion ken inisiatiba ket agtultuloy a  mangkomplementar ti sustenable  a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno in-inut a maalay-ayan  ti kinakurapay iti ikub ti pampamilia dagitoy a maseknan a benepisiario ti 4 P’s.

Nakikaysa met iti FDS da Miss Aida Cueto, Municipal 4 P’s Focal Person ken ni Mrs. Wilma Cruz, agpada a pannakabagi ti MSWDO.  # (Web In-Action) 

No comments:

Post a Comment