Cabugao, Ilocos Sur – Iti pannaki-amad ti Web In-Action idi Hunio 15, 2013, imbatad dagiti agdaldaliasat a natalged a mapagnaanen ti kaes-estimar a rangtay ti Alina-ay a mangitunda kadagiti agdaldaliasat manipud kadagiti barangay iti amianan a daya ti Munisipalidad a kumamang kadagiti barangay ti Poblasion ti ili a Cabugao.
Ti pannakatarimaan ti nadakamat a rangtay ket nailungalong babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno agtultuloy ti inaldaw a panagdaliasat/pannakausar dagiti agnanaed kadagiti nadakamat a barangay ken saan a maparalisa iti pannakaibiahe dagiti produkto dagiti mannalon.
Sakbayna, naglasat dagiti biahero iti De-tour a naaramid iti dalan a pagnaan iti lansad ti Karayan Cabugao (awan pay ti danumna idi) iti baba ti daya ti rangtay ket naikamakam a mausar ti rangtay sakbay ti kaadda ti ayus.
Impeksa dagiti agdaldaliasat iti naan-anay a panagyamanda kadagiti dadaulo ti Gobierno Lokal ti ili a Cabugao ta madagdagus met a matarimaan ti nasao a rangtay no agdadael. Nupay kasta, nasayud manen ti papan-panagsubli dagiti umili kadaytoy a rota ti kalsada a mangiturong kadakuada kadagiti aktibidadesda kadagiti barangay iti ruar ti Poblasion babaen iti Alina-ay-Quezon Road a mapagnaanda. # (Web In-Action)
No comments:
Post a Comment