Thursday, June 6, 2013

KALSADA NGA AGPA-TALTALON, MAISAGUT DAGITI MANNALON


Cabugao, Ilocos Sur – Dagiti mannalon ti kangrunaan a maisagut iti kalsada a naaramid ken kumamang iti tengnga ti pagtatalonan iti Barangay Turod Patac, Cabugao, Ilocos Sur manipud iti Sitio Balungabing.

Imbatad ni Brgy. Captain Edgar Celestino Sonido nga inkagumaananda a makapaaramidda ti kalsada a kumamang iti pagtatalonan tapno manam-ayan dagiti mannalon a mapan agobra iti talonda ken mausar iti panagiruarda ti apitda no panaggagapas.

Tinawen a mantenerenda daytoy a kalsada babaen ti panagtinnulong ti  barangay ken ti  Gobierno Munisipal  tapno madadaan nga usarenda ti dalan no panawen ti panagtalon.

Iti agdama, naisibaran pay ti naaramid a dalan iti abay ti napakali a kanal a nagkukursada iti pagtatalonan tapno adda pagnaan dagiti mannalon a  mapan mangawid ti danum ken mangdalus iti kanal no panawen ti panagpadakkel ti mulada a pagay.

Dagitoy nga inisiatiba ket gubuay ti natunos a panagtimpuyog dagiti mannalon ken dagiti Opisiales ti Barangay kasta met ti panangtarabay ti Gobierno Munisipal kadagiti kasapulan dagiti mannalon ditoy a deppaarna iti Munisipalidad. # (Web In-Action)

No comments:

Post a Comment