Friday, June 14, 2013

RESEARCH PROJECT, IWAYAT TI ILIARC-REGION 1 DITOY CABUGAO

Cabugao, Ilocos Sur – Nakikoordinar ni Dr. Luciana T. Cruz, Research Specialist, Ilocos Integrated Research Consortium (ILIARC)-Bacnotan Office, RFU 1 iti DA-LGU Cabugao babaen kada Municipal Agriculturist Zenaida S. Andrada ken ni Municipal Rice Program  Coordinator Nereo S. Daproza, AT tapno estudiarenna  ti datos dagiti  ecosystem’s  status  ti  ag-4,300 a bilang ti  mannalon para iti saline prone area, drought prone area, submergence area, ken cool elevated area a disso ti pagtatalonan tapno mayintekda dagiti mabukel a Teknolohia ken wagas ti panangidur-as ti panagpatanor ti mula a pagay ditoy a deppaar.


Imbatad ni Mr. Nereo S. Daproza, AT a mayur-uray ti resulta iti nadakamat a panagsukisok a  pakabenepisiaran dagiti mannalon.  Innayon ni Dr. Luciana T. Cruz a  maysa ti LGU-Cabugao a pakaipakatan dagitoy a panagsukisok  maigapu iti naan-anay a suportana iti programa ken proyeko ti Departamento ti Agrikultura (DA).

Dagitoy nga aksion  ken inisiatiba ket gubuay ti di agsarday a pannakikammayet ti DA-LGU Cabugao iti DA-RFU 1 tapno maited kadagiti mannalon ti umisu a wagas ti panagtalon ken agtultuloy met a suporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagitoy a napateg a  programa a mangiragpat ti kasasaad dagiti mayoridad a mannalon ti Munisipalidad. # (Web In-Action)

No comments:

Post a Comment