Cabugao, Ilocos Sur – Nakipaset dagiti mannalon ti ili a Cabugao iti programa ti DA-Provincial Office, Ilocos Sur iti DWRS Radio Station, Tamag, Vigan City, Ilocos Sur nga “School on the Air” babaen ken ni Engr. Jojo Acance a Host.
Daytoy a gannuat ket pangparungbo iti programa ti National Government ita iti 2013 a National Year of Rice Program a ti panggepna ket Staple Food Sufficiency. Nangrugi ti programa idi Abril 1, 2013 manipud 5:00 am agingga iti 5:30 am iti kada aldaw ti Miyerkoles, Huebes ken Biyernesn a mangngegan iti nadakamat a radio station.
Segun iti mapagdamagan, adda 70 nga aktibo a mannalon ti Cabugao nga immuna a nagenrol kadaytoy nga awis ti DA-Provincial Office a kaaduanna a kameng ti BACALL MPA. Babaen ti panagdengdengngegda iti lektura, makipasetda iti maangay nga eksaminasion iti tunggal Biernes ket ipatulodda dagiti sungbatda iti programa.
Agur-uray ti agduduma a gunggona a buklen ti Certificate/Diploma, Medal/Plake, Gifts/Token kasta met iti Cash ken in-kind agricultural supplies iti kaaduan ti Farmer’s Enrollees ken mangabak iti kangrunaan a puesto. Agpatingga daytoy a programa iti agtapos ti Hunio 2013.
Daytoy a programa ket naibilang dagiti mannalon ti ili a Cabugao a napakaammuan a makipartisipar babaen iti surat ni Provincial Agriculturist Teofilo R. Quintal ken ni Mayor Edgardo “Ediboy” S. Cobangbang, Jr. idi Marso 12, 2013 a maiturong iti imatang dagiti Municipal Technologists iti DA-LGU nga idauluan ni Municipal Agriculturist Zenaida S. Andrada a maseknan a mangipatungpal itoy.
Manamnama a maammuan dagiti mangabak a mannalon iti sumarsaruno nga aldaw a panaggraduarda kas Farmer-Enrollees. # (Web In-Action)
No comments:
Post a Comment