Thursday, June 6, 2013

MANGROVE SEEDLINGS, NAIMULA ITI BRGY. PUG-OS

Cabugao, Ilocos Sur – Iti pannakiuman ti Web In-Action idi Hunio 5, 2013, imbatad ni Mrs. Milagros Ramirez  Paz, Municipal Fisheries Coordinator nga umaboten ti 186,000 a mangrove seedlings ti dagup ti naimula dagiti kameng ti Pug-os Fishermen Association nga idauluan ni Kagawad   Alfonso Asunio, Presidente,  iti aplaya ti  Purok Sadiri, Barangay Pug-os, Cabugao,llocos Sur. Daytoy ti  bilang ti naimuladan  manipud idi damo a tapoganda a  mulaan ti kakadilianan a paset ti Purok Sadiri, Barangay Pug-os.

Iti agdama, kapades nga agtan-ay dagiti mangrove plants ket pinanagananda ditoy disso a nagmulaanda iti “Mangrove Sanctuary”  tapno maawid ti imatang dagiti lumugar a saanda a mapan agas-asak iti minulaan tapno saan a matungday ti panagtan-ayda.

Innayon pay ni Kagawad Asunio a kalikagumanda met a maitulad ti kabaybayanda idiay Barangay Dardarat ken Barangay Sabang tapno adda siparda iti pegges ti ayus ti baybay apaman nga agrabanga ti ramut dagiti mangrove plants.

Insupusop ni Mrs. Paz a daytoy a mula ti natakuatan  iti benneg ti Fishery a makabenepisiar agsipud ta adu ti maitulongna iti agkalkalap, panangpaadu ti pagikanan ken iti pannakatagiben ti rekursos-naturales a mapreserbar iti kabaybayan.

Dagitoy a gannuat ket gubuay  ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. babaen ti panagkammayetda iti Bureau of Fisheries and Aquatic Resources (BFAR) Regional Office 1 tapno maipamaysa ti pannakatulong dagiti mangngalap ken agindeg iti igid ti kabaybayan iti pagbiaganda ken proteksionda iti kalamidad. # (Web In-Action)

No comments:

Post a Comment