RAINFED PROJECTS, MAARAMID ITI 2 A BRGY. TI CABUGAO

Cabugao, Ilocos Sur – Naiwayat ti Evaluation Survey ti 15 ektarias a di mamulmulaan (rice fallow)  a taltalon tunggal Main Crop (Nobiembre-Mayo) kada tawen iti Brgy. Reppa-ac-Brgy. Pug-os, Cabugao, Ilocos Sur babaen iti  Titulo ti programa: “Increasing Productivity in Rainfed Areas in Region 1 through Introduction of Modern Rice Farming Technologies” nga iwaywayat  ti Regional Field Unit 1, Department of Agriculture (DA), San Fernando City, La Union.

Iti pannaki-amad ti Web In-Action idi Hunio 13, 2013, imbatad ni Mr. Nereo S. Daproza, Municipal Rice Program Coordinator a daytoy a proyekto ket sakupenna dagiti mannalon ti Brgy. Pug-os ken Brgy. Reppa-ac babaen ti 5 a Cluster Approaches  ket maaramid ti 2 a Farmer’s Field School (FFS) iti 16 weeks:  Umuna, pagay; maikadua, mais ken nateng ken agdepende iti suplay ti danum.

Innayon ni Mr. Daproza nga iti Estimated Project Costs-na ket iti sumaganad:
P70,000 - FFS (2 cycles)
P420,000- Pump & Engine Sets
P180,000 – Seeds and Inorganic Fertilizers
P155,000-Program Management

Umabot ti P825,000 ti balor ti proyekto. Insupusop pay ni Mr. Daproza a tarawidwidan dagiti Supervising Technicians ti nasao a proyekto a karaman ti Municipal Rice Program Coordinator, Provincial Extension and Training Specialists ken Provincial Rice Program Coordinator.

Panggep ti proyekto a padur-asen ti Food Staple Sufficiency (bagas ken mais)  babaen iti pannakabukibok  dagiti daga a di mamulmulaan iti Main Crop   kadagiti  rainfed rice farming communities kas iti dua a nadakamat a barangay ken para iti seguridad ti taraon.

Dagitoy nga aksion ken inisiatiba ket gubuay iti agtultuloy a panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti programa  ti Agrikultura  tapno maital-o ti produksion  dagiti mannalon iti pagtaraon para kadagiti umili ti Cabugao, Ilocos Sur. 

Iti agdama, naideliberen ti pito  a bags  ti rice seeds a mausar iti daytoy a proyekto a naggapu iti DA-Provincial Office ket sumarsaruno ti 18 pay a bags a  rice seeds a nayonna  ita a panagtatalon. # (Web In-Action)