Cabugao, Ilocos Sur – Iti pannakiuman ti Web In-Action itay nabiit, impakaammo ni Dr. Bernardino M. De Gracia, OIC Municipal Health Officer iti MHO-RHU Cabugao nga agtultuloy iti kaadu ti bilang ti agpaagas iti Balay Pagagasan ti ili kas iti benneg ti Medical, Dental, Pre-Natal, BP Check-up, pabakuna ti ubbing manipud maladaga, ubbing, agtutubo, agkabannuag ken nataengan a nangrugi iti Enero 2014.Kabayatanna, naipakaammo babaen iti MHO-RHU a maangay ti nasaknap a pannakabakuna ti ubbing kontra iti “Tigdas” wenno Kamuras inton Enero 30, 2014 gapu iti mapaspasangasangan a panagraira daytoy a sakit dagiti ubbing ken maladaga.
Iti sabali a bangir, agtultuloy latta met iti panagtignay dagiti kameng ti “Kalusugan Pangkalahatan” a programa kadagiti barangay a buklen dagiti (Brgy. Health Workers (BHW’s), Committee Chair on Health Kagawad) a baybayabayen dagiti pannakabagi ti MHO-RHU tapno maaywanan ti seguridad ti salun-at dagiti agindeg ditoy babaen iti itutulong ti Munisipio.Dagitoy nga inisiatiba ket resulta iti napintas a koordinasion dagiti mangimatmaton iti Sektor ti Salun-at ken iti babaen ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a pannakatagiben ti salun-at dagiti umili a kakibin iti nabuslon a panagdur-as ti ili. # (Web In-Action)
No comments:
Post a Comment