Cabugao, Ilocos Sur – Kalpasan a nainagoraran ti baro a Flagpole iti sango ni Dr. Jose P. Rizal Monument ket naaramid metten ti Flag Raising Ceremony ti Pamilia-LGU Cabugao nga indauluan ni Mayor Edgardo S. Cobangbang, Jr. iti bigat ti aldaw ti Lunes, Enero 6, 2014.
Kalpasan a naisa ti bandera, nayam-ammo iti Pamilia LGU-Cabugao ti kabarbaro nga agakem a Hues iti Municipal Trial Court, Cabugao a ni Judge Homer Jay Ragonjan. Inyam-ammo ni Mayor Ediboy ti baro a Hues iti imatang ti Pamilia LGU.
Nagyaman met ni Hues Ragonjan iti nabara a pannakasarabona iti LGU-Cabugao. Anag pay ti Mensahena iti panangbigbigna iti nasayud a pannakaipatungpal ti Katarungang Pambarangay Law babaen kadagiti Opisiales ti Barangay kadagiti barbarangay ti ili a Cabugao a nangikabassit ti bilang ti kaso a matamtaming ditoy nga ili.
Nasubadan met dayta a pammadayaw iti nabara a panangabrasa ti Pamilia LGU iti panagakem ti Baro a Hues ti ili. # (Web In-Action)
No comments:
Post a Comment