Cabugao, Ilocos Sur – Maipatpatungpal ita ti Season-Long Vegetables Farmers Field Schools on IPM Kasakalikasan Training kadagiti mannalon nga agmulmula ti nateng iti Brgy. Dardarat, Cabugao, Ilocos Sur a naiproyekto iti Nobiembre 2013-March 2014 babaen iti panagkammayet ti DA-Regional Field Office (RFO) 1, San Fernando City, La Union ken ti LGU-Cabugao nga idauluan ni Mayor Edgardo S. Cobangbang, Jr.Segun ken ni Mrs. Ester P. Aguimbag, AT, High Value Crops Development Program (HVCDP) Coordinator ti LGU-Cabugao, maap-apiten ti naimulada a “Django” Hot Pepper iti 1,000 metro-kuadrado a Learning Field-da iti lote ni Mr. Sherwin Garcia iti nasao a barangay kabayatan ti 16 a lawas a pannakaiyimplimentar ti proyekto nga imatonan ti DA-LGU Cabugao.
Innayon ni Mrs. Aguimbag a kangrunaan a panggep ti proyekto ket iti pannakagun-od ti pannakaingato ti bilang ti maapit ken mangibaba ti gastos kasta met iti pannakaikkat ti mailaok a kemikal iti produksion babaen iti pannakausar ti VAM ( Vesicular Arbuscular Mycorrhizae) a soil inoculant ken iti Trichoderma (Fungicides) a pangpaksiat ti tumaud a sakit ti mula.
Insupusop ni Mrs. Aguimbag nga umabot ti 5 nga oras a panagtrabaho iti talon babaen iti Participatory Technology Development Farm (Learning Field) ti aramiden dagiti Farmer-Beneficiaries ken maangay ti Group Discussion kalpasanna.
Dagitoy nga inisiatiba ket resulta ti agtultuloy a programa ti Gobierno Munisipal iti benneg ti Agrikultura nga ibirokanda ti pakalag-anan ken pagkakitaan dagiti mannalon babaen iti Baro a Teknolohia ti panagmula ti nateng nga itden ti Ahensia ti DA. # (Web In-Action)
No comments:
Post a Comment