Cabugao, Ilocos Sur – Kalpasan ti panagkiddaw dagiti Barangay Nurseries iti kada barangay iti mainayon nga imulada iti umay a panagtutudo/panagmumula, imbatad ni Municipal Plant and Nursery Coordinator Robert S. Savella itay nabiit nga agtultuloy nga agpatuboda iti sukat dagiti pimmanaw a seedlings.
Mainayon nga agal-ala ti seedlings dagiti agkakasar maigapu iti kasapulan a “Love Tree” nga alaen dagiti agassawa sakbay a makapagkallaysada nga ituding ti maysa nga Ordinansa ti ili.
Innayon ni Mr. Savella nga ikagkagumaananda ti nagurnong iti bukel ti Gmelina ken Mahogany tapno mapatuboda iti uneg ti Nursery ket apagisunto nga agtan-ayda inton maibus manen ti nagyan ti Municipal Nursery.
Insupusop ni Mr. Savella a malaksid iti nagduduma a Fruit Seedlings a naka-stand by iti uneg ti Nursery, kalikagumanda a manteneren ti kaadda ti bilang ti 5,000 a masagsaganan a Tree Seedlings para iti Tree Planting ken Reforestation Project ti Munisipio ken iti barangay.
Dagitoy nga inisiatiba ket gubuay ti direktiba ti LGU Chief Executive ti ili ti Cabugao a pannakasustener ti kaadda ti nagduduma a seedlings iti Municipal Plant and Nursery tapno adda masagsagana a mainayon a maimula kadagiti mabalin pay a pagmulaan a disso ken pagsugot kadagiti nagmulaanen iti kallabes a panagtutudo.
Segun pay ken ni MENRO Edgar S. Balangatan, AT, kasapulan koma nga adda 10,000 a bilang ti madadaan a Seedlings a mapatanor iti Municipal Nursery tapno adda pangsupusop iti pagkasapulan dagiti dadduma nga Ahensia wenno indibidual nga agkidkiddaw ti seedlings iti unos ti makatawen. # (Web Situational Report)
No comments:
Post a Comment