Tuesday, January 21, 2014

PANGLINTEGAN A DALAN, ADU TI MAIRANUD

Cabugao, Ilocos Sur -  Iti pannakisarita ti Web In-Action ken ni Brgy. Captain Rolando S. Savellano ti Brgy. Cuancabal, Cabugao, Ilocos Sur iti Enero 20, 2014, impakaammona nga adu ti mabenepisiaran iti naaramid a dalan a panglintegan manipud iti Provincial Road a mabatogan ti Sitio Cabaruan, Brgy. Cuancabal a sumilpo kadagiti Feeder Roads  a mapan iti Sitio Nagcaritaan, Balungabing ken Brgy. Turod Patac.


Daytoy a pannakaaramid ti dalan ket inlungalong ti Gobierno Probinsial babaen  ken ni Vice Governor Deogracias Victor B. Savellano, dagiti Kapitanes ti agsumbangir a barangay: Barangay Turod Patac ken Brgy. Cuancabal a da  Brgy. Captain Edgardo Celestino G. Sonido ken ni Pasado Kapitan Rogelio S. Siruno ti Brgy. Cuancabal ken iti Gobierno Munisipal nga idauluan ni Mayor Edgardo “Ediboy” S. Cobangbang, Jr.


Innayon ni Kapitan Savellano nga agyamyaman dagiti makausar ta   manam-ayanda nga agdaliasat nga agallatiw kadagiti nadakamat a Sitios ken Barangay ta addan panglinteganda imbes a manglikawda iti Brgy. Turod Patac iti laud ken iti Brgy. Arnap iti daya.

Dagitoy nga inisiatiba ket gubuay ti napintas a panagkammayyet ti Gobierno Probinsial, Munisipal ken ti Barangay iti pannakaited iti napintas a pagnaan dagiti agindeg a mangpadaras iti aktibidad a makatulong  iti ekonomia kadagitoy a deppaar. # (Web In-Action)

No comments:

Post a Comment