Cabugao, Ilocos Sur – Saan a problema ita a panagnanateng (Dry Season Crop 2013-2014) ti panaglako dagiti mannalon iti produktoda a nagduduma a nateng maigapu ta pinadas metten ti Cabugao Vegetable Growers and Producers Association nga idauluan ni Mr. Armando Azcueta iti agangkat ti ilakoda a bulto ti nateng kas iti ar-aramiden dagiti local traders ken dumaydayo a bagonan nga aggapu iti Urdaneta ken Balintawak ditoy bagsakan ti nateng iti ili ti Cabugao, Ilocos Sur.
Innayon ni Mr. Azcueta a nupay nangingngina no maminsan iti P2 ti kada kilo ti presio dagiti dumayo a Traders, kayatda latta met ta adda mapasamak a kompetision ti panaggatang a mangital-o ti presio ket maisagut met dagiti nakauna nga agmula ti nateng a kailianda.
Nupay kasta, imbatad ni Mr. Azcueta iti singasingna a maikkan koma ti Municipal Permit dagiti amin nga agangkat ken aggatang ti nateng idiay bagsakan ta isu pay a mapastrek ti kaha ti ili ken maiprayoridad met dagiti barangay nga agmulmula a pakaipanan ti proyekto a mangpasayaat ti kasasaad dagiti Vegetable Growers.
Iti agdama, impadamag ni Mr. Azcueta nga agipakpakargada ken dagiti kakaduana iti ilakoda a nateng idiay Urdaneta ken Balintawak a dumalan iti “Temporario a Bagsakan” iti umabot ti 7,000 a kilos (7 Tons) ket maus-usar dagiti naipasublat a “Soft Loan” manipud iti LGU Cabugao a pag-kapitalda a Vegetable Growers.
Insupusop pay ni Mr. Azcueta a kasapulan met dagiti padana nga agmulmula ti nateng a taliawenda ti LGU a mangtultulong kadakuada a no maaprobaran ti Municipal Permit kadagiti aggatang/agangkat ket patasda met a makatulong iti Gobierno Munisipal iti “Income Generation” nga agsublinto met la kadakuada iti babaen ti porma ti serbisio. # (Web In-Action)
No comments:
Post a Comment