Cabugao, Ilocos Sur – Inawat ti 270 a recipients nga umili a nadadaelan ti pagtaenganda kadagiti kallabes a panagbagyona babaen iti panangited ti Department of Social Welfare and Development (DSWD) a naidalan iti LGU-Cabugao iti Oktubre 16, 2015 iti Cabugao Cultural and Sports Complex, Brgy. Rizal, Cabugao, Ilocos Sur.
Nasangaili ti Munisipio ni Ms. Fe Sarmiento, Social Work Officer III a pannakabagi ti DSWD Regional Office 1 ken tinulongan dagiti Staff ti MSWDO nga idauluan ni MSWD Officer Lydia S. Gazmen iti pannakaurnos dagiti papeles dagiti nag-claim nga umili sakbay nga inawatda ti mabatayanda a gatad.
Sakbay a nairugi ti Pay-out ket kimmablaaw ken nagyaman ni Mrs. Gazmen. Inlawlawagna ti pakabuklan ti Emergency Shelter Assistance (ESA) ti DSWD ket pagyamananna iti agtultuloy a panagtarabay ti LGU-Cabugao nga idauluan ni Mayor Edgardo “Ediboy” S. Cobangbang, Jr. kasta met kadagiti Opisiales ti DSWD ta sumangpeten daytoy a saranay kadagiti nadadaelan ti balayda kadagiti naglabas a bagyo.
Nagsarita ni Mayor Edgardo “Ediboy” S. Cobangbang, Jr. Kimmablaaw ken nagyaman iti daytoy a dimteng manen a tulong manipud iti nasional a gobierno a naidalan iti rehion, probinsial ken munisipal a benneg. Innayon ni Mayor Ediboy a daytoy ti mangipakita a dagiti empleado, department heads ken naelektaran nga opisiales ti munisipio ket ammoda a tuntonen ti pundo a sumangpet kadagiti kailianda nga aggatad ti 1.4 Million a direkta nga awaten dagiti benepisiario.
Insupusopna a daytoy a kabaelanda a mangpasangpet ti pundo ket maigapu iti napintas a kammayetda nga Opisiales ti Gobierno Lokal. Maipampaneknek kadagiti bisita a naannayas ken nadalus dagitoy a maited kadagiti umawat nga umili.
Imbatad manen ti Ama ti ili nga awan ti pangisukatanna iti mariknana a ragsak ta nagbalin isuna a pangulo ti kasisiglatan nga ili nga ammoda a tuntonen ti karbenganda a serbisio iti sidong dagiti Ahensia.
Dinakamatna pay ti sangsangkamaysa a panangimatangda nga Opisiales daytoy a pagsayaatan nga awaten dagiti umili ken agyaman met kadagiti Konsehales iti Konseho Munisipal nga idauluan ni Vice Mayor DJ Savellano iti masindadaan latta a panangsuportada kadagiti lungalong ken gannuat a kas itoy a para iti pagsayaatan dagiti umili a saan laeng a maigapu ti kalamidad.
Iti pannakiuman ti Web In-Action kadagiti immawat ti tulong ket impeksada ti nalaus a panagyamanda iti Gobierno Munisipal nga idauluan ni Mayor Ediboy kasta metten iti DSWD ta makatulong a dakkel kadakuada daytoy nga inawatda a gatad.
Nakikaysa iti nasao a Pay-out da SBM Danny Q. Gazmen; SBM Vicky S. Serna; SBM Atty. Bryan Jett S. Pano, Committee Chair on Social Services; SBM Benedicto M. Savellano; SBM Jayhan Alcid-Tan; SBM Josefina S. Vallejo; MSWD Officer Mrs. Lydia S. Gazmen; Brgy. Captain Arnold “Bambi” Yangat ken dadduma pay a Kapitanes ken Opisiales ti Barangay a nangtarabay kadagiti immay nagala ti tulong a kalugaranda. # (Web In-Action)
No comments:
Post a Comment