Thursday, October 15, 2015

CASH FOR WORK TI 33 A BARANGAY TI CABUGAO, INTED TI DSWD

Cabugao, Ilocos Sur – Inawat ti umabot ti nasurok a 900 nga umili  iti bayad ti panagtrabahoda (10 nga aldaw ti nabatayan ti tunggal maysa) iti Cash for Work Program ti Department of Social Welfare and Development (DSWD) a  tinarabay ti LGU-Cabugao kadagiti 33 a barangay ti ili iti Oktubre 15, 2015 iti Cabugao Cultural and Sports Complex, Brgy. Rizal, Cabugao, Ilocos Sur.


Nasangaili ti pannakabagi ti DSWD Regional Office 1 a tinulongan dagiti Staff ti MSWDO nga idauluan ni MSWD Officer Lydia S. Gazmen iti pannakaproseso dagiti papeles dagiti nag-claim nga umili sakbay nga inawatda ti mabatayanda a bayad a nakakuentaan ti aldaw a panagobrada iti barangayda.

Sakbay a nairugi ti Pay-out ket kimmablaaw ken nagyaman ni Mrs. Gazmen.  Inlawlawagna ti pakabuklan ti programa ti Cash  for Work ti DSWD ket pagyamananna iti  agtultuloy a  suporta ti LGU-Cabugao nga idauluan ni Mayor Edgardo “Ediboy” S. Cobangbang, Jr. kasta met kadagiti Opisiales ti DSWD ta simmangpeten daytoy a gundaway nga inur-uray dagiti nagobra iti Cash for Work Program. 


Nagsarita met ni Mayor Edgardo “Ediboy” S. Cobangbang, Jr. Kimmablaaw ken nagyaman iti daytoy a pagsayaatan nga impagteng ti nasional a gobierno a mangpalag-an ti kasasaad ken rikna  dagiti umili. Dinayaw ti Alkalde  ta dagiti kailianna  nga itrabaho  iti naipakumit kadakuada a pagrebbengan. 

Imbatad ti Ama ti ili nga awan ti panangisukatanna iti mariknana a ragsak ta nagbalin isuna a pangulo ti kasisiglatan nga ili ken dagiti agnanaed nga ammoda a tuntonen ti karbenganda a serbisio iti sidong dagiti Ahensia.

Innayonna a sapay koma ta ti kinasiglat  ti ili ken dagiti mangidadaulo ket maartapanto koma met dagiti sumarsaruno a henerasion a lideres tapno agtultuloy latta a naragsak ken nasaliwanwan ti biag  dagiti umili ti Cabugao.


Inulit ni Mayor Ediboy a dinakamat ti umabot ti 1.9 Million a gatad a masagrap ita nga aldaw dagiti kailianna ket ninamnamana nga iti pannnakaigatang dagitoy a gatad iti pagtagilakuan idiay  Tiendaan ket isu manen a mainayon a maurnong iti taripa a maukkon a maipan iti Kaha ti Gobierno yantangay agsubli met la a serbisio a para kadagiti umili daytoy babaen iti langa ti nagduduma a serbisio a maited kadakuada.

Dinakamatna pay ti sangsangkamaysa a panangimatangda nga Opisiales daytoy a pagsayaatan nga awaten dagiti umili ken agyaman met kadagiti Konsehales iti Konseho Munisipal nga idauluan ni Vice Mayor DJ Savellano iti masindadaan latta a panangsuportada kadagiti lungalong ken gannuat a kas itoy a para iti pagsayaatan dagiti umili.


Iti pannakiuman ti Web In-Action kadagiti immawat ti bayad ti panagtrabahoda ket impeksada ti nalaus a panagyamanda iti Gobierno Munisipal nga idauluan ni Mayor Ediboy kasta metten iti DSWD ta no kaskasano ket makatulong kadakuada daytoy nga inawatda nangruna a para  iti pamiliada. 

Nakikaysa iti nasao a Pay-out da SBM Danny Q. Gazmen; SBM Vicky S. Serna;  SBM Dr. Jemaima S. Tan- Yee, SBM Atty. Bryan Jett S. Pano, Committee Chair on Social Services;  SBM Benedicto  M. Savellano; SBM Jayhan Alcid-Tan;  SBM Josefina S. Vallejo; ABC President Teddy U. Soller; MSWD Officer Mrs. Lydia S. Gazmen;  ken ni Brgy. Captain Arnold “Bambi” Yangat. # (Web In-Action)

No comments:

Post a Comment