SMALL FARM WATER RESERVOIR (SFWR) TI DUA A BARANGAY, NAILEPPAS

Cabugao, Ilocos Sur – Iti pannakiuman ti Web In-Action ken ni Mr. Edgar S. Balangatan, AT, naileppasen dagiti priority project ti LGU Cabugao nga idauluan ni Mayor Edgardo “Ediboy” S. Cobangbang, Jr.  ken  ti Provincial Government ti Ilocos Sur nga idauluan ni Gov. Ryan  Luis V. Singson iti Barangay Lipit ken Barangay Pila, Cabugao, Ilocos Sur nga Small Farm Water Reservoir (SFWR).

Sakbayna, adda ti  pagtatalonan  iti masakupan  ti  Brgy. Pila iti  saan a mapadanonan ti irigasion no panagtatalon  ket agpannurayda  laeng ti tudo iti danumenda kasta met iti kadarapatda a barangay iti laud nga abagatanna.

Iti pannakiuman ti Web In-Action  iti kallabes,  imbatad dagiti maseknan a  mannalon iti nadakamat a barangay a kaaduan a pagdanumda ti maurnong a tudo ken  agpannurayda iti  ayus ti kalsada ken  waig no panagtatalon. Innayonda  a nadarasda met  a makapagraep ngem itinto panagpadakkelda ti mulada a pagay ti problemada ta agdependedanto ti itinnag ti ngato a pagdanumda ti raepda.

Babaen iti naregget a panangtulong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti rainfed farmers, nakikammayyet ti Munisipio kadagiti  maseknan nga Ahensia kas iti Bureau of Soils and Water Management (BSWM) ken iti Gobierno Probinsial  iti  agdama iti pannakaaramid ti Small Farm Water Reservoirs (SFWR’s)  iti ili a Cabugao a pangrisut daytoy a pakaseknan  dagiti rainfed area farmers.

Naaramid  dagiti proyekto iti Brgy. Pila  ken Brgy. Lipit a nakakalian iti nauneg ken nalawa nga  abut a pagurnongan ti danum tapno adda madadaan a mausar dagiti mannalon (siphonic wenno mapakunotan ti motor) no agtikag ti rinaepanda.

Naaramid dagitoy a proyekto babaen iti Munisipio ken  iti pannakitinnarabay dagiti mannalon/opisiales ti barangay  iti nadakamat a barangay. Manamnama a makatulong ti dakkel daytoy a proyekto iti panawen ti panagtatalon ket impeksa dagiti mannalon a makasagrap ditoy a deppaarna  ti dakkel a  panagyamanda iti LGU-Cabugao iti panangilungalongda kadagiti nadakamat nga Ahensia tapno maikkanda iti katulongan a pagdanuman. # (Web In-Action)