Cabugao, Ilocos Sur – Nagsapata dagiti napili a Young Public Servant (YPS) mangrugi iti Posision ti Mayor, Bise Mayor, Department Heads ken dagiti pakaisaadanda iti Sangguniang Bayan agraman dagiti Ahensia a nakasalinong iti LGU-Cabugao agingga iti Department Heads ti nadumaduma nga Opisina ti LGU-Cabugao ken ni Mayor Edgardo “Ediboy” S. Cobangbang, Jr. iti Oktubre 26, 2015 kalpasan ti Flag Ceremony iti imatang ti Pamilia-LGU Cabugao iti sango ti Munisipio.
Sakbayna, naelektaran ni Mr. John Mike Sardeng iti Cabugao Institute a Young Mayor ket ni met Ms. Jee Kyla S. Suniega ti Cabugao North Central School a Young Vice Mayor.
Kalpasan ti Flag Ceremony, inawagan ni Mr. Dario Roy A. Siruno, Municipal Tourism and Information Officer a saggaysa dagiti naelektaran a Young Public Servant iti sango manipud kadagiti nadumaduma a pageskuelaan ti ili ti Cabugao a maisaad iti Opisina ti Mayor, Bise Mayor, Department Heads agingga iti Sangguniang Bayan ken iti nadumaduma pay a Departamento ti LGU-Cabugao.
Pinagsapata ida ni Mayor Ediboy iti imatang ti Pamilia-LGU a pakairamanan dagiti Department Heads, Municipal Officials ken dagiti pannakabagi dagiti Ahensia iti salinong ti LGU-Cabugao kas iti PNP ken ti BFP.
Iti Mensahe ni Mayor Ediboy, kimmablaaw ken nagyaman ta maited manen daytoy a tinawen a pribilehio nga ited ti Munisipio - pannakaited ti pagrebbengan kadagiti ubbing nga agad-adal a mangakem kadagiti responsibilidad dagiti Opisiales Lokal ken dadaulo ti nadumaduma nga Opisina iti LGU-Cabugao. Kunana nga iti pannakaselebrar ti Children’s Month, ti pannakaitandudo ti Young Public Servant ti napili ti Munisipio a pakataliawan dagiti ubbing agsipud ta nakadepender kadakuada iti masakbayan ti ili a Cabugao.
Innayon ni Mayor Ediboy a maragsakan kadaytoy a maar-aramid ta iti kinaganus ti isip dagitoy nga ubbing ket addaandan ti potensial nga agbalin a lider ken matubayda iti disiplina a mangrienda iti ili iti masanguanan nga aldaw gapu ta isuda dagiti sumaruno a henerasion ti umili.
Insupusop ti Ama ti Ili a dagitoy nga ubbing ket mataliawdanto dagitoy a pannakaikumit ita ti pagrebbengan kadakuada ket aramidendanto dagiti umisu a galad ken pagrebbengan a matuladda kadagiti nataengan para iti nadur-as nga ili ti Cabugao. Impeksa pay ni Mayor Ediboy ti dakkel nga ekspektasion ti kaaduan a mayobra dagitoy a young public servant iti umay iyasug dagiti kliente iti inaldaw a panagserbida a pakainaigan iti biagda babaen met la iti panangtarabay kadakuada dagiti pangulo ti opisina a pakaidesignaranda.
Inapresiar pay ti Alkalde Munisipal iti kinakooperar itatta dagitoy a Young Public Servant iti naikumit kadakuada a pagrebbengan a mangrugi iti daytoy a petsa a panagsapatada iti akemda ta aw-awitenda iti unipormeda ti marka ti Municipal Seal ti ili a Cabugao.
“Congratulations! Good Luck for the day!” kinuna ni Mayor Ediboy.
Nakikaysa met dagiti kameng ti Konseho Munisipal nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Benedicto M. Savellano; SBM Jayhan Alcid-Tan; SBM Atty. Bryan Jett S. Pano; ken ni SBM Josefina S. Vallejo iti seremonia ti panamagsapata kadagiti Young Public Servant. # (Web In-Action)
No comments:
Post a Comment