Tuesday, October 13, 2015

ELDERLY WEEK CELEBRATION, NAARAMID ITI RIZAL PARK

Cabugao, Ilocos Sur – Naaramid ti panagselebrar dagiti kameng ti Cabugao Federated  Senior Citizens Association maipapan iti Elderly Filipino Week Celebration iti Oktubre 13, 2015 babaen iti Tema: “Nakatatanda: Gabay, Tulay, Kaagapay at Bantay Tungo sa Kaunlaran” iti Rizal Park, Brgy. Rizal, Cabugao, Ilocos Sur. 


Immuna a naangay ti Nasantuan a Misa iti St. Mark the Evangelist Parish Church iti 7:00 A.M.. Naaramid ti Walkaton/Fun Walk iti National Highway sa naangay  ti salu-salo ket sinagrapda dagiti naisagana a napagsasanguan iti Senior Citizen’s  Center. Kalpasanna, naaramid ti programa iti Parke.

Indauluan ni Dr. Romeo Pira, Spiritual Adviser ti Invocation.Kalpasan ti pannakakanta ti Pambansang Awit, 

Nag-Welcome Address ni Mrs. Constancia S. Sonido, FSCA Vice President, ket inawisna  ti amin nga umili a mangimatang iti naregget a pannakipaset dagiti nataengan iti kagimongan babaen kadaytoy a selebrasion.

Naaramid ti Roll Call dagiti Opisiales ti tunggal barangay nga inaramid ni OSCA Head Mr. Remigio S. Sunico.

Naiballaet ti Intermission Number babaen ti panagkanta ti pannakabagi ti Brgy. Bato Senior Citizen.

Naaramid ti Folk Dance babaen kadagiti nataengan a babbai.


Nag-Mensahe ni Mayor Edgardo “Ediboy” S. Cobangbang, Jr.  Kimmablaaw ken nagyaman iti daytoy a programa a mangpalag-an ti kasasaad ken rikna  dagiti nataengan. Dinayaw ti Alkalde  ti pannakaammo dagiti nataengan a mangtunton ti pribilehio a kaibatoganda. Innayonna a maibilang a sanggir iti agdama ken iti masakbayan ti Cabugao dagiti nataengan ket rebbengna laeng a maikkanda iti pannakaasikaso ken pagnam-ayan tapno dagiti sumarsaruno a henerasion ket tuladenda ket maaramidto  met ti kastoy a pannakaasikaso ken pannakapadayaw kadakuada.

Imbatad ti Ama ti ili nga awan ti panangisukatanna iti mariknana a ragsak iti sidong dagiti nataengan ta nakaysada a makidangdanggay iti Munisipio ken manmano ti kakastoy a karagsak dagiti nataengan iti panagselebrarda iti naited kadakuada a pannakabigbig iti kagimongan.


Bininsa pay ni Mayor Ediboy dagiti pagsayaatanen a masagsagrap dagiti Senior Citizen kas iti Social Pension, libre a Philhealth ken pannakausarda iti baro a Dental Clinic ken  maipatakder dagiti  dadduma a pasilidad ti Munisipio a makaited ti pagimbaganda a kas iti STAC Building  including Geriatrics a pakaangayanto dagiti agpa-Physical Therapy. Manamnama pay a mainayon a maipatakder ti Dialysis Center nga idonar dagiti managayat ken agtaltalek a kailian a Pamilia idiay Hawaii.

Kangrunaan unay, inawis ti Ama ti Ili dagiti nataengan nga idanonda koma kenkuana dagiti kayatda pay a mainayon a makaited ti pagimbagan dagiti natgaengan tapno maitrabahoda ket maiparikna kadakuada iti subad ti panagan-anusda ken agtultuloy a pammatida iti Munisipio.


Nagsarita met ni SBM Atty. Bryann Jett S. Pano, Committee Chair on Social Services ket dinakamatna ti panangbigbig ti Konseho Munisipal dagitoy a panangsuportar kadagiti nataengan kas pasetda iti pannakatulong  ti Gobierno Nasional ken Lokal  kadakuada. Impadamagna iti kaadda ti baro a printer ti computer a naited kadakuada.

Nangipaay met ti Mensahe ni Retired Judge Efren S. Ubungen ket dinakamatna nga uray kaskasano ket makatulongda pay laeng a nataengan iti panagsayaat ti komunidadda ken  ti ilida.


Binagi met ni Dr. Bernardino P. De Gracia, OIC Municipal Health Officer ti ili a Cabugao nga imbislin ti Caring for the Elderly a pakaseknan unay dagiti annuroten ti salun-at dagiti nataengan tapno pumaut pay ti panangnanamda ti biagda. 

Kalpasan ti maysa pay nga Intermission Number (Panagdaniw), binagi ni Mr. Bonifacio S. Somera, Presidente, ti Closing Remarks. Pinagyamananna iti amin a timmabuno iti naballigi a panagselebrarda a nataengan.

Nakikaysa iti panagselebrar da  Former Mayor Andrea Soller-Tan; SBM Danny Q. Gazmen; SBM Vicky S. Serna;  SBM Dr. Jemaima S. Tan- Yee, SBM Atty. Bryan Jett S. Pano, Committee Chair on Social Services;  SBM Benedicto  M. Savellano; SBM Jayhan Alcid-Tan;  SBM Josefina S. Vallejo; ABC President Teddy U. Soller; Budget Officer Marietta S. Cruz;  ken ni Brgy. Captain Arnold “Bambi” Yangat. 

Nagpaay nga Emcee ni OSCA Head Mr. Remigio S. Sunico. # (Web In-Action)

No comments:

Post a Comment