Cabugao, Ilocos Sur – Nakasagana ken nagtignay ti puersa ti Municipal Disaster Risk Reduction Management Council (MDRRMC)-LGU Cabugao, Ilocos Sur kasta met dagiti WASAR Rescuers babaen iti panangimaton ni MDRRMC Officer Engr. Nestor B. Somera apaman a namonitorda ti isusungad ni “Bagyo Lando” idi aldaw ti Oktubre 17, 2015 ditoy Ilokos babaen iti PAG-ASA Bulletin.
Malaksid ti panagmonitor ti MDRRMC Members iti National Highway, napanda pay kadagiti calamity prone area (inland ken coastal area) tapno obserbaranda ti epekto ti pumigpigsa a tudo ken angin.
Naikonsentrar dagiti lugan/heavy equipment ti LGU-Cabugao iti asideg ti Munisipio tapno adda masindadaan a mausarda no adda agpaarayat wenno emerhensia a mapanda aksionan.
Daytoy a panagsagana ket naibasar iti nangato a level ti koordinasion ti MDRRMC kadagiti kabinuligna nga Opisina ken Ahensia ti Gobierno a masakupan pay iti PDRRMC-Ilocos Sur no adda nakaro a tudtudo, layus, uram, aksidente ti lugan ken kanaigna a didigra a mapasamak iti las-ud ti Probinsia.
Dagitoy nga aksion ken inisiatiba ket maigapu latta iti napartak a panangipatungpal ti pagrebbenganda iti MDRRMC-Cabugao nga idauluan ni Mayor Edgardo “Ediboy” S. Cobangbang, Jr., MDRRMC Chairperson nga agibagnos iti panawen ti napigsa a tudtudo wenno layus tapno maprotektaran dagiti umili iti epekto ti kalamidad. # (Web Situational Report)
No comments:
Post a Comment