DIRECT SEEDING A PAGAY TI SITIO CALLAGUIP, NAKANANAMA

Cabugao, Ilocos Sur – Sumagmamano  ti mapaggang nga agmula ti pagay no Dry Crop Season (November-May) gapu ta natakkon ti tudo ken kumirang ti padanum. Ngem gapu ta tumartarabay met ti Ahensia ti Gobierno kas iti Ilocos Integrated Agricultural Research Center, (DA-Batac City, Ilocos Norte) kasta met ti LGU-C abugao, napinget dagiti farmer-cooperators ti ag-lima ektaria ti kalawana a “sabog-tanim” a masarakan iti Sitio Callaguip, Barangay Baclig, Cabugao, Ilocos Sur.

Segun ken ni Mr. Obas Billy Y. Baclig, Municipal Technologist ken Seed Inspector, DA-LGU Cabugao a naresistansia dagitoy a kabaruanan a bin-i a mayataday unay kadagiti rainfed area, saline area (matapliakan ti apgad), submerge area (lungog/kalubuan) ken irrigated area. Iti panagballigi daytoy umuna a pannakaipadas daytoy a teknolohia ditoy Cabugao, innayon ni Mr. Baclig a mamulaanton ti amin a mayat a pagmulaan ti pagay a kaaduanna nga agbakante agsipud ta awan ti maitutop a klase ti pagay a maimula.

Imbatad met dagiti Agrikultor ti DA ken ti ILIARC a mapaboran dagiti mannalon no agmulada met laeng iti pagay no kastoy a paniempo tapno mabalanse ti suplay ti produkto nangruna ta no puro nateng ket bigla nga agsuek ti presio iti merkado no adu unay ti maapit a nateng.

Mangnamnama ni Mr. Nereo S. Daproza, Municipal Rice Program Coordinator, DA-LGU Cabugao,  a mabalanse ti kaadu ti  apit ita a panagmumula agsipud ta namantener a namulaan dagiti disso a mayat ti pagay ket saan a makatakatan ti suplay a bagas nupay kaaduan ita ti nagmula ti tabako.
Nupay kasta, naynay a panagmonitor ti ar-aramidenda iti opisinada iti DA-LGU tapno maantisiparan dagiti tumaud a pakaseknan dagiti mannalon a dida kabaelan a solbaren iti naimulada.

Paset ti programa ti agdama nga administrasion nga idauluan ni Mayor Edgardo “Ediboy” S. Cobangbang, Jr. ti pannakatingiting/pannakaiwayat  dagiti epektibo nga addang tapno mamantener ti umdas a produksion ti bagas a kangrunaan a kasapulan dagiti umili.

Ti ILIARC 5 Hectares Cluster  Techno-Demo iti Sitio Callaguip, Barangay Baclig ket as-asistiran ti sibubukel a kameng ti DA-LGU Cabugao nga idauluan ni MA Zenaida S. Andrada ken Field Agricultural Technologist Dionicia R. Seatriz. # (Web Situational Report)

Meeting dagiti kameng ti DA-LGU sakbay ti panagmonitorda

NAPAADDA TI KURANG TI KALSADA TI BRGY. CUANTACLA

Cabugao, Ilocos Sur -  Ti Farm-to-market road ti Barangay Cuantacla ket naiproyekto a makongkreto ken dati a   napunduan iti P1,000,000 (Maysa a Million a Pisos)  babaen iti panangyimplimentar ti  napalabas nga Administrasion.

   

Iti panagtugaw ni Mayor Edgardo “Ediboy” S. Cobangbang, Jr.  a mangidaulo ti ili, binirokna ti nakaitrabahuan ti nadakamat a kantidad  gapu  iti kalikagum dagiti bumarangay iti nasao a lugar.  

Iti nagkammayet a duktal ti Commission on Audit (COA) ken Project Monitoring Committee (PMC), natakuatan a mapukpukaw ti naiproyekto a kalsada iti dagup ti  P516,715.14 wenno nasurok   a  50% (Singkuenta Porsiento)  iti  nailatang a pundo daytoy.

Kanaig daytoy, pinasingkedan ni Engr. Crescencio C. Formoso, Municipal Engineer a  naitrabahon daytoy a  kurang ti nasao a proyekto babaen iti dati a Kontraktor. # (Web In-Action)

PANNAKAPALUBOS TI ROUGH TOOTHED DOLPHIN

Cabugao, Ilocos Sur  – Iti dayta nga aldaw (Disiembre 31, 2011)  a pannakaisadsad ti dolphin iti Barangay Daclapan, napusgan  ni Dr.Melvin Castro, DVM, Municipal Livestock Inspector,  a mangasikaso ti parsua ti baybay babaen ti pammilin ni Mayor Edgardo “Ediboy” S. Cobangbang, Jr. a nakaawat ti report sakbayna maipapan iti maidakdaknir a dolphin iti Barangay Daclapan, Cabugao, Ilocos Sur.

Nagpatulong ni Dr. Castro ken ni Brgy. Captain Edgardo S. Cobangbang, Sr. ti Barangay Sabang a maiyallatiw ditoy ti dolphin agsipud ta ad-adu ti paset ti baybay ti Barangay Sabang  a nalinlinak a pagpaungaran ken pangagasanda.

Siaayat ni Kapitan Cobangbang, Sr. ken dagiti  kalugaranna a timmulong iti pannakaiyallatiw ken  pannakaasikaso ti dolphin. Natakuatan ni Dr. Castro nga agkakapuy ken kasapulanna ti pannakaagas  ti parsua ti baybay ket tinudokanna ti mayannatup a multivitamin ken antibiotic ken binantayanda  a siaanus ti panagpaungar daytoy.

Alas tres pasado ti malem  idi matingitingda ti pannakaungar/pimmigsa  ti dolphin ket tinulonganda a nangitulod iti adalem a paset ti aplaya tapno agawiden iti naggapuanna.

Timmulong pay ti agassawa a  French National Surfers a nangala iti video ti pasamak kasta met dagiti Fish Warden iti Barangay Sabang. 

Iti panangitulodda iti dolphin iti panagawidna, namimpito a nagsublisubli a kasla ketdin rigatennan ti agawid ta  kumarayo kadagiti mapanawanna a nangsapuyot kenkuana. Iti naudi a panangigiyada,    saanen a nagsubli pay ti dolphin ket ninamnama dagiti namalubos a nasurotanna ti pagawidanna a pangsarakanna kadagiti kapulianna.

Kalpasanna, nakitinnawag ni Dr. Castro iti opisina ti Philippine Marine and Mammals Stranding Network iti  Ocean Adventure, Subic, Olongapo City ket dinayawda ni Dr. Castro ken  ti Gobierno Munisipal iti pannakaisalakan daytoy nga endangered specie. Segun kadakuada, nagasat ken manmano ti agbiag a maidaknir a kakastoy a parsua ti baybay.

Ti roughed tooth Dolphin ket manamnama nga agdagsen ti 150 kilograms. (Web In-Action)

 

 

 

 

 

ROUGH TOOTHED DOLPHIN, NAISADSAD IDIAY BRGY. DACLAPAN

Cabugao, Ilocos Sur  – Maysa a dolphin ti naisadsad iti katangriban ti Barangay Daclapan, Cabugao, Ilocos Sur idi Disiembre  31, 2011 a no sadino a ditoy ket naduktalan ni Ms. Julie Saniatan a managkadilian ditoy a lugar.

Dagus a nayuman iti Munisipio ket nagaksion a dagus da  Mrs. Milagros R. Paz, Fishery Coordinator ken Dr. Melvyn Castro, DVM,  ken   nangayabda  ti kaduada a napan nangkita kadaytoy nga endangered specie. Dakkel ti pammati ni Mrs. Paz a napleng ti dolphin iti maipagarup a pannakadayyeg a pinarnuay  ti napabettak a dinamita a puon ti nakaulawanna ken saanna a pannakabael nga aglangoy a sumurot iti nabugtak a pangenda.

Innayon ni Mrs. Paz a sensitibo dagitoy a parsua ti baybay ket galadda ti agpangen no agdakiwasda nga agbirok  ti babassit nga ikan a kanenda. Barkadada ti buslogan ken tuna a mangmangan met ti babassit nga ikan. Agnaed dagiti dolphin iti nauneg a paset ti tangrib ket mainayon a pagtaraonda ti ruot ti baybay para iti oksiheno a kasapulanda. Kaaduanna a lumung-awda  nga agpisaw  gapu ta lumang-abda ti angin kalpasan ti kada 30 minutos a panagbabadda iti uneg ti danum.

Imbatad ti Fishery Coordinator a mannakigayyem dagitoy a parsua ti danum ket makaay-ayo ti unida a di maipalawag no kasano ti kinasistematiko ti komunikasionda iti padada uray adayo ti baetda.
Pakdaar ti Gobierno Munisipal iti panangidaulo ni Mayor Edgardo “Ediboy” S. Cobangbang, Jr. kasta met iti  BFAR ken ti NFARMC ti nainget a pannakaprotektar dagiti maibilang nga endangered species ken panangliklik koma  ti illegal a wagas ti panagkalap tapno saanda a maapektaran. Maipawil a tiliwen ken pagtaraon ti dolphin  ta mamulta ti P120,000 ken mabalud ti innem a bulan ti asinoman a mapaneknekan a mangdangran kadagitoy a nabiag ti baybay, segun pay ken ni Mrs. Paz.  # (Web In-Action)

CABUGAO, A RECIPIENT OF THE SEAL OF GOOD HOUSEKEEPING

The Local Government Unit of Cabugao, Ilocos Sur qualified as recipient of the Seal of Good Housekeeping from the Department of Interior and Local Government. Through a memorandum dated December 23, 2011, Secretary Jesse Robredo informed OIC Regional Director of DILG, Ms. Julie Daquioag of provinces, cities and municipalities who passed the Goal of Good Housekeeping and have qualified as recipients of the Local Government Support Fund (LGSF) in Region I.

The LGSF, according to the memo, “shall be utilized as capital expenditures and shall be used to augment their respective approved 2012 Annual Investment Plan”. The municipality will receive P800,000.00 and has allotted the fund for the improvement of coastal road in Brgy. Pug-os with the construction of a seawall in this coastal barangay. As everybody might be familiar with the barangay, it is a major tourist destination not only in the municipality but in the province as well.

The objective of this DILG program is to “renew commitment to aggressively scale up interventions aimed at elevating the practice of good housekeeping that values desirable development outcomes into institutionalized status.” It “accords primacy to the principle of accountability and transparency.” During the municipality’s evaluation, it satisfied areas on sound fiscal management & accountable and transparent governance.

BARO A TAWEN 2012, BARO A NAMNAMA TI UMILI!

Cabugao, Ilocos Sur – Sangsangkamaysa a nangrambak  dagiti umili ti Cabugao, Ilocos Sur nga idauluan ni Alkalde, Mayor Edgardo “Ediboy” S. Cobangbang, Jr.  iti isasangbay ti Tawen 2012. Sakbayna, nagsagsaganan dagiti kaamaan ti panangpasungadda iti Baro a Tawen babaen ti panaggatangda iti nagbubukel ti klasena  a prutas a maidatag iti tengnga ti lamisaan barbareng umanam ti gasat ti Tawen ti Dragon a 2012  nga ibaybayog dagiti Insik a nasuerte ti pagkakitaan.

Idiay away, kayatda met ti  makagun-od koma ti gasat    a kas kadagiti  taga-sentro isu  nga inkarigatanda met ti nagsagana kas iti inaramid ti taga-ili. Ba’am dita uray naisakripisio iti “nabatogan a langit” basta maaramid dagiti di mapekka a kannawidan a nailaga ti biag ken pakapnekan-rikna  a pakabuklan ti Kultura ni Ilokano!

Napaspas ti panagwerret ti ligay ti negosio nangruna kadagiti aglaklako ti makan, masida ken paputok. Adda nasapa, kalalainganna ken naladaw bassit a nagluto ti mapagsasanguan. Napunno ti ragragsak, rinnabak, katkatawa dagiti pagtaengan gapu iti rungbo ti panagrambak  ti isasangbay ti Baro a Tawen 2012. Naobserbar a sakbay a natapogan ti Disiembre, manmano ti mapakuan ti lako a sida kas iti karne ti nuang, baboy, baka ken manok. Uray ti kaikanan, maikipas amin a magatang. Iti malem ti Enero 1, 2012, nakidkidan ti lako nga ikan iti puesto idinto ta di latta agressat ti tao a sumangpet nga aggatang.

Kaaduan ti umili a nagatendar ti Nasantuan a Misa ta nairana pay a Domingo iti kaaldawan ti Baro a Tawen. Madlaw a dominante ti Simbaan Romano Katoliko ti nakimisa ngem naregta met dagiti dadduma a sekta ken denominasion a nag-service ken fellowship. Kalikaguman dagiti umili a mabendisionan/mapasingkedan  dagiti imetda a “New Year’s Resolution” barbareng ad-adu ita ti pagsuertean ken narasrasay ti pakapaayan.

Iti biang ti linak ken talna, nagballigi dagiti aksion a naipatungpal babaen kadagiti agtengtengngel ti linak ken talna  (PNP,BFP, BPATS-Brgy. Tanod, Traffic Officer/Enforcers-Blue Boys)   tapno naurnos, naragsak ken naballigi ti panagrambak ti isasangbay ti Tawen 2012! # (Web Situational Report)

Ladawan ti panag-inspection ti kameng ti Bureau of Fire Protection (BFP)

 

 

 

ROLYO TI HOSE, NAITED ITI MUNISIPIO

Cabugao, Ilocos Sur –  Maibatay iti resulta ti  inspection ti  Commission On Audit (COA)-Project Monitoring Committee (PMC) iti kallabes a tawen, natakuatan a nagkurang ti bulto ti hose a naiproyekto  iti panangyimplimentar ti napalabas nga Administrasion iti babaen ni Pasado a Mayor, Dr. Diocaesar S. Suero.   

Gapu itoy, kinalikaguman ti agdama a Gobierno Munisipal nga idauluan ni Mayor Edgardo “Ediboy” S. Cobangbang, Jr. a mapasubli   ti kurang ti materiales  kas paset ti nasamay a pannakaipatungpal ti  “Rectification” a programa ti Gobierno Munisipal.  

Kanaigna,  nagtungpal   ti supplier   a nangiyeg ti pagbayadna iti Munisipio  a nakabaloran ti P250,000 a rolyo ti hose  tapno madalusanen ti nagan daytoy, segun ken ni Engr. Crescencio C. Formoso, Municipal Engineer. 

Maysa daytoy a panggep ti “ Good Governance” a programa ni Mayor Ediboy a mangkorehir/ mangpasubli kadagiti nai-proyekto a saan naawat/wenno naited amin  kadagiti nakaisangratanna  a barangay ken umili.  # (Web Team)