NAREGTA TI PROGRAMA TI OISCA ITI CABUGAO

Cabugao, Ilocos Sur – Simmarungkar dagiti pannakabagi ti Organization of International  Social and Cultural Advancement (OISCA)  a grupo dagiti eskolar a Hapones  iti opisina ni Mayor Edgardo S. Cobangbang, Jr. idi Agosto 2, 2012 babaen ti panangbayabay ni Mr. Ronel Ubaldo, Head Teacher 3 ti Salomague Elementary School a nagtarusan ti delegasion. Sinango ken kinasarsarita ida ni SB Member Benedict M. Savellano iti Opisina ti Mayor kabayatan nga inyurayda ti Ama ti Ili.

Ti isasangbayda manen ditoy Cabugao  ket paset ti panangsurnadda kadagiti proyekto ken aktibidad a narugianda iti kallabes a tawen partikular iti Barangay Dardarat ken Salapasap iti panagmulada iti Mangrove plants iti aplaya kadagitoy a Coastal Barangay ti ili. Kayatda a manayonan dagitoy a programa babaen ti panagmulada met iti ababaw a paset ti kabaybayan ti Brgy. Salomague.

Iti agsapa ti Agosto 3, 2012, naangay ti ababa a programa iti sango ti  Salomague Elementary School a no sadino a ditoy ket nangted  ti delegasion ti OISCA iti musical instrument  kadagiti ubbing, token item, ken reading material iti pagadalan. Kalpasanna, nag- Heritage Tour-da  iti Siudad ti Vigan sada nagsubli iti eskuela iti aldaw a nakipulapolanda  iti Ama ti Ili, Mayor Ediboy S. Cobangbang, Jr.

Nagyaman ken impeksa  ni Mayor Ediboy iti nabara a panangpasangbayna kadakuada iti  panangipaayda latta  iti serbisio ken ayat kadagiti kailianna ti Cabugao  kas mayalubog  iti programa ken proyekto ti gungloda a Hapones iti OISCA.

Planoda ti agmula  ti mangrove  iti ababaw a paset ti kabaybayan ti Brgy. Salomague no agsimpa ti panawen. 

Dagiti nagan ti Hapones a delegasion ti OISCA ket isuda: Mr. Kojima Takuro, Mr. Sakatani Sachio, Mr. Yonehashi Tatsuo, Mr. Watanabe Toshiyuki, Mr. Matsuo Toru, Mr. Nuida Naoto, Ms. Ota Mayumi, Ms. Yamasaki Kana, Mr. Kiyomizu Toshiharu ken Mr. Yamasaki Satoshi.  # (Web In-Action)

BARO A KAGAWAD TI BRGY. SAGAYADEN, PINAGSAPATA NI MAYOR EDIBOY

Cabugao, Ilocos Sur – Pinagsapata ni Mayor Edgardo S. Cobangbang, Jr. dagiti baro a Barangay Kagawad ti Barangay Sagayaden, Cabugao, Ilocos Sur nga isuda: Rogelio Barlolong, Maricon N. Sunio, ken Geraldine G. Sesuca nga inimatangan  da Brgy. Captain Virgilio S. Piros ken LGO Officer 5 Constancia L. Quinola ita nga Agosto 2, 2012 iti Opisina ti Mayor. # (Web In-Action)

BRGY. ARAGAN: OUTSTANDING LUPONG TAGAPAMAYAPA TI REGION 1

Cabugao, Ilocos Sur – Maysa manen a barangay ti Munisipalidad ti Cabugao ti nangyalat ti pammadayaw kas Outstanding Lupong Tagapamayapa Incentives Awards (LTIA) CY 2011  ti Brgy. Aragan, Cabugao, Ilocos Sur nga idauluan ni Brgy. Captain Modesto Ronque.

Nayawat ti Certificate of Recognition ken ni Brgy. Captain Ronque babaen kada  DILG Provincial Director Victoria Ramos ken ni Mayor Edgardo S. Cobangbang, Jr. a binayabay ni  Local Government Operations Officer 5 Constancia Lazo Quinola  idi  Agosto 1, 2012 iti SB-ABC Hall, Cabugao, Ilocos Sur.

Nagatendar met ken nakiragup iti ladawan da Ms. Cherry Pestano, Focal Person, LTIA, DILG-Provincial Office kasta met da SB Member Benedict M. Savellano ken  ABC President,  Brgy. Captain Teddy U. Soller agraman dagiti kameng ti Lupong Tagapamayapa iti Barangay Aragan.

Pinirmaan ni DILG Regional Director Manuel V. Biason, CESO III, DILG Region 1, City of San Fernando, La Union ken Chairperson, Lupong Tagapamayapa Incentive Awards Committee ti naited a Certificate of Recognition iti Barangay Aragan. # (Web In-Action)

NAM-AY/PROGRESO TI GUBUAYEN TI NASAYAAT A DALAN

Cabugao, Ilocos Sur – Saanen a paudi ti Barangay Alina-ay nga idauluan ni Brgy. Captain Melanio Santella  no pannakapasayaat ti  kalsada ti pagsasaritaan. Kalkalpas ti pannakakongkreto ti dalan a sumrek iti amianan ti rangtay (Alina-ay Bridge)  ti Barangay a namagkakamang ti purok ti balbalay iti ungto dagiti ninayon ken  asideg ti Karayan Cabugao.

“Nasayaaten  ti pagdalananmi a mangiruar iti apitenmi. Agyamankami ken ni Diputado Ryan ken ni Mayor Ediboy,” kinuna ni Mr. Jovencio Selma, Presidente ti Alina-ay Farmer’s Association idi kauman ti Web In-Action idi Hulio 31, 2012 iti asideg ti talonna.

Ti sumrek a kalsada ket nakongkreto babaen ti Congressional Fund ni Diputado Ryan Luis V. Singson, First District, Ilocos Sur  ken iti akin-uneg a  sementado a paset ti  kalsada a    kumamang iti kabalbalayan   ket   naggapu iti bingay ti Munisipio iti RA 7171 iti nausar a pundona, segun ken ni Municipal Engineer Crescencio “Nonoy”  C. Formoso.

Ti programa ti Gobierno Munisipal nga idauluan ni Mayor Ediboy  a pannakaitandudo ti Agrikultura ket kabuybuyogna ti agtultuloy a  pannakapasayat dagiti kalsada tapno agpinsanda  a mangitunda iti  naan-anay a panagdur-as ti kasasaad dagiti mannalon iti Munisipalidad. # (Web In-Action)

NAPINTASEN TI SUMREKAN ITI SITIO MADULA

Cabugao, Ilocos Sur – Iti agtultuloy a programa ti Gobierno Munisipal nga idauluan ni Mayor Ediboy S. Cobangbang, Jr. a pannakapasayaat dagiti kalsada ti barangay, nairaman metten a nasemento  ti sumrekan a dalan a mapan iti Sitio Madula, Barangay Turod Patac, Cabugao, Ilocos Sur nga idauluan ni Brgy. Captain Edgardo Sonido.

Segun ken ni Municipal Engineer Crescencio C. Formoso, bingay ti Munisipio iti RA 7171 ti nausar iti pannakakongkreto ti kalsada a sumrek iti Sitio Madula.

“Nasimpan   ti dalan. Saan a kas idi a lasonglasong. Agyamankami iti Opisiales ti Munisipio   nga idauluan da Apo Mayor. Sapay koma ta  makongkrito ti dalan  agingga iti pagpatinggaan ti balbalay ti purok,” kinuna ni Mr. Delfin Tagayuna, agindeg ti nasao a lugar idi kauman ti Web In-Action idi Hulio 31, 2012 iti Sitio Madula, Barangay Turod-Patac. # (Web In-Action)

ADDA TI MUNICIPAL TECHNO-DEMO ITI BARANGAY ALINA-AY

Cabugao, Ilocos Sur – Pannakikaysa iti Rice  Program   iti Gobierno Munisipal nga idauluan ni Mayor Edgardo “Ediboy” S. Cobangbang, Jr. nga imatmatonan ti DA-LGU  ti panggep ti Alina-ay Farmer’s Association nga idauluan ni Mr. Jovencio Selma. Mismo nga isuna a pangulo ti agisungsong kadagiti kalugaranna nga agmula ti certified seeds wenno hybrid   tapno maingato ti bilang ti apit ket mapatuladanna dagiti kaarrubana a mannalon.

Iti agdama, aglawa ti Media-Ektaria ti minulaan ni Presidente Selma iti NSICRc 216  a klasena a pagay ita a Wet Season Crop  2012 iti mismo a sango ti pagtaenganda iti Barangay Alina-ay.
Nairaep daytoy a klasena a pagay idi Hunio 15, 2012 ket manamnama a maapit inton Oktubre 20, 2012. Mapatta-patta  met  a makaapit ti nagmula iti 6.5 Tonelada ti kada ektaria iti pakaibasaranna.

“Napadasakon  a  pinaggiddan  ti  hybrid ken inbred ta pagdiligek ti apitda. Ad-adu ti 20-25 a kaban ti hybrid ti kada ektaria, ngem agpadpadada a mayat latta  nga imula. No maasikaso a naimbag ti inbred, nadagsen ngamin met  ti kilosna, ” impudno ni Apo Selma.

Innayonna: “Pagyamananmi  ken    ni Mayor Ediboy ta adda kastoy a programa nga irusrusat  ti Munisipio ditoy Cabugao. Adun ti mapatuladan nangruna ditoy sulsuli  ket ti laeng panangirugi  ti narigat. Mairamanda  koma  a  maikkan ti demo inton maminsan  dagitay interesado met  nga agpadas.”

Ti Municipal Techno-Demo ket imatmatonan ni Municipal Rice Program Coordinator Nereo S. Daproza, AT/DA LGU. # (Web In-Action)

AKREDITASION TI SENIOR CITIZEN CENTER, MAARAMID

Cabugao, Ilocos Sur – Nagmiting ti Pederasion ti nataengan ita nga aldaw, Hulio  31, 2012 iti Senior Citizen Center, Brgy. Rizal, Cabugao, Ilocos Sur  babaen ti panang-Preside ni Mr. Antonio N. Sabio, Federated President  tapno tratarenda dagiti kasapulan a mapaadda iti pannaka-akreditar ti Federated Senior Citizen’s Center ti Cabugao, Ilocos Sur  tapno   maiyintek ti tulong manipud iti nangatngato nga Opisina.   

 

 

 

Iti nasao a panagtitipon, naigiddan ti naipaay a  Medical Service dagiti Personnel  ti RHU kadagiti nataengan. Kaaduan ti nagpa-Blood Pressure ket no adda matakuatan a nakaro ti  an-annayenna  ket maipanda iti RHU ta amirisen ti Doktor sa maagasan. Kadawyan a mapasamak daytoy no adda mitingda ket pagyamananda iti Munisipio ta  dakkel ti maitulongna kadakuada a nataengan, segun ken ni Mr. Orencio Sadioa, Opisial ti Pederasion.

          Kalpasan a napagnanamingan dagiti maaramid ken maisubmiter a Papers for Accreditation, na-update pay ti Financial Resources ti Pederasion.

          Imbatad ni Mr. Remigio B. Sunico, OSCA Head a mangiparuarda ti  Newsletter ti Senior Citizen agingga iti Disiembre 2012. Bininsana nga agpannurayda iti makalapda nga advertisements, compliments ken tulong manipud iti LGU-MSWD kasta pay ti dadduma nga NGO’s. Innayon ni Mr. Sunico a daytoy ti ramit a  mangiwarnak ti pateg dagiti plano ken programada a nataengan iti panagkaykaysada a kas maysa a  gunglo  iti kagimongan. # (Web In-Action)