AGAS KEN PALAGIP TI SAGRAPEN TI UMILI ITI RHU

Cabugao, Ilocos Sur – Agtultuloy nga umadu ti agpaagas iti Rural Health Unit gapu ti madagdagus a panakataming, madadaan nga agas a maited ken maited a pammalagip maipapan iti panangmantener   dagiti pasiente ti salun-atda ket umad-adu  ti umay a pasiente  nangruna iti aldaw ti Lunes.

Iti panakiuman ti Web In-Action kadagiti RHU Personnel idi Setiembre 3, 2012, imbatadda a kaaduan a rikriknaen dagiti umay agpaagas ket panateng, uyek ken gurigor nangruna kadagiti ubbing. Kaaduan pay nga ubbing ti nabakunaan ken agkabannuag a nagpaparut ti ngipen iti Dentista. 

Ti agtultuloy a    pannakatagiben ti salun-at dagiti umili ket prayoridad a programa ti  Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)

RAGUP-OBRA TI BARANGAY ITI REGGAAY TI SITIO TARA-TARA FMR

Cabugao, Ilocos Sur (Setiembre 3, 2012) – Naiyusuat ti ragup nga obra dagiti bumarangay ti Brgy. Maradodon, Catucdaan ken Sisim iti pannaka-sandbag ti reggaay ti pingir ti kongkreto a farm-to-market road a masarakan iti Sitio Tara-tara, Brgy. Sisim, Cabugao, Ilocos Sur a pangyur-urayanda ti natibtibker  a panangsimpa ti LGU.

Iti pannakiuman ti Web In-Action kadagiti opisiales ti barangay, imbaga  ni Brgy. Captain Dominador Seguritan a  sinapada a nagobra ngem  medio marigatanda ta mano-mano  ti panagbunagda ti makali a daga ket napagkaykaysaanda kada Brgy. Captain Geogie Benavidez ken Brgy. Captain Ruben Siruno ti panangkiddawda ti Loader   ti Munisipio tapno mapalag-ananda iti trabahoda. Nagtignay ni Brgy. Captain Siruno a napan iti Opisina ni  Mayor Ediboy  tapno agkiddaw ti makinaria.

Di mabayag, impakaammo  ni Municipal Engineer Crescencio C. Formoso a naipatuloden iti Munisipio  ti  makinaria a  mangtulong kadagiti agobra iti Sitio Tara-tara.

Innayon ni Kapitan Seguritan a napateg a sigudenda daytoy a reggaay ta apektadoda nga akinsurong a barangay no saan a madalanan daytoy a kakaisuna a panglinteganda nga agpa-ili no kapigsa ti danum iti karayan. # (Web In-Action)

2ND BATCH TI TREE PLANTING, KASKASDI A NABALLIGI

Cabugao, Ilocos Sur –Naangay ti maikadua nga eskediul ti panagmula ti seedlings sadiay Magarang Spring  and Watershed Area, Brgy. Cacadiran, Cabugao, Ilocos Sur idi Setiembre 1, 2012 a no sadino a ditoy ket nagpartisiparan ti nadumaduma nga Ahensia, Barangay, NGO’s   ken Opisina ti LGU Cabugao.

Nakipaset met dagiti  kameng ti law enforcement agencies a kas iti Philippine Army, 81st Infantry Battalion, 7ID, Alpha Company babaen ti panangidaulo ni 1st Lt. Virgilio Caesar Parvera, ti Municipal Police Station nga idauluan ni Deputy Chief Nestor Savellano ken iti Bureau of Fire Safety babaen ti panangibagnos ni Fire  Marshall Elmer Acapuyan kadagiti kakaduana.

Indauluan met da Dr. Lotgarda Tayao ti RHU Cabugao,  Mr.  Florante Jara, ti MPDC, Meselyn Cachapero ti Assessor’s Office, SB Member Benedict M. Savellano ken SB Secretary Maxfel S. Suboc ti Sangguniang Bayan, Waterworks, Treasurer’s Office, ken Mr. Elmer G. Bromeo ti Federated Farmers.

Nakipaset met dagiti Opisiales ti Barangay  iti maikadua nga eskediul. Dagiti Kapitanes a nangidaulo kadagiti kakaduada a  nag-Tree Planting ket da  Marga-ay Brgy. Captain James Sera, Pila Brgy. Captain Romeo Galamgam ken Pug-os Brgy. Captain Arnold Yangat.

Nakipartisipar met da Liga ng mga Barangay Secretaries President Ronnie Bringas ken kakaduana, estudiante ti Cabugao National High School nga idauluan ni Principal Felipa B. Asuncion ken dadduma pay a pannakabagi ti sektor nga adda iti 2nd Batch schedule. 

Tunggal nagmula ket dimmagasda ti imulada a seedlings  iti arubayan ti  Punong Barangay ti  Sitio Rebba, Brgy. Cacadiran ken iti temporario a nursery iti katengngaan  ti dalan nga agturong iti Magarang Spring. In-giya ida ni MENRO-Designate Edgar S. Balangatan ti disso a pagmulaan ti grupoda. Imbatad ti MENRO a naballigi daytoy nga aktibidad iti dayta nga aldaw. # (Web In-Action)

BARANGAY A NAAPEKTARAN TI TUDO, TULONGAN TI LGU

Cabugao, Ilocos Sur – Dagiti  Barangay  ti  Maradodon, Cael-layan,  Catucdaan ken Sisim  ket  naireport iti Munisipio  a kangrunaan a  naapektaran  iti kallabes a nagsasaruno nga aldaw a napigsa ti tudo gapu iti agsubli-subli a bagyo ken Habagat.   Idi Setiembre 1, 2012, impadamag ni Brgy. Captain Dominador Seguritan  a dimmanon a nagbisita ni Mayor Edgardo “Ediboy” S. Cobangbang, Jr. idiay Barangay Catucdaan  tapno kitaenna ti pakaseknan dagiti lumugar,  nadadael a pasilidad ken impraestruktura ken makapatangna dagiti opisiales ken lumugar  ti kadarapat a  barangay a maseknan tapno maaksionan a daras dagitoy.

Iti Barangay Maradodon, naipadamag a kasapulan ti serbisio ti buldoser tapno maipulang ti na-wash out a rechanneling project  ken maisimpa  ti dadduma a paset ti dalan a kinurukor ti naglippias  a danum ti karayan  iti kapigsa ti tudo ti Habagat.

Iti Barangay Catucdaan, insingasing  ni Brgy. Captain Dominador Seguritan a maaramid koma a box culvert ti kanayon a makurukor a drainage crossing  iti dalan a mapan iti eskuela ken kasta met a kasapulan ti buldoser ken loader a mangipulang iti atiddog a  nayanud a naitambak iti  rechanneling site ti karayan a mabatogan ti barangay-da.

Iti met Brgy. Sisim, nareggaay  ti paset ti  pingir ti turod nga asideg ti kongkreto a kalsada iti Sitio Tara-tara. Ginubuay daytoy ti panagrasi ti daga  iti napigsa ken napaut a tudo. Temporario a nagaburan ti reggaay babaen ti naiwayat a ragup-obra ti tallo a nadakamat a barangay ken timmulong ti makinaria ti Munisipio.

Imbatad ni Municipal Engineer  Crescencio C. Formoso iti pannakiuman ti Web In-Action a tarimaanenda  dagitoy a disso ti nadadael babaen  iti mayeskediul a panangobra ti  makinaria ti Munisipio ken mayaramidan ti Program of Works (POW) dagiti matarimaan nga istraktura wenno pasilidad a kasapulan ti dakdakkel a  mausar iti  pannakasimpada.

Innayon ti Inhiniero  nga adda pay sumagmamano a disso ti ayan ti nakurukor ken nayanud  kas iti dalan iti Sitio Padayog, Brgy. Cael-layan ken Sitio Madula, Barangay Turod-Patac.

Ti panangaksion  ti Munisipio a  mangsigud a mangsimpa kadagiti nadadael nga impraestruktura ken pasilidad  gapu iti kalamidad a dimteng ket maysa a kangrunaan  nga addangna  tapno agtultuloy ti pannakausar dagitoy  a saan a maapektaran ti panagbiag dagiti maseknan nga umili nangruna iti nasulinek a barangay. # (Web In-Action)

PANAGPATUBO TI SEEDLINGS, MAAR-ARAMID ITI MUNICIPAL NURSERY

Cabugao, Ilocos Sur – Maar-aramid  ti panagitukit  iti uneg ti  supot ti bukel ti Manila Palm (butsina) a naglaokan ti taep ken daga tapno nasigsigo ti panagtan-ay ti rusing daytoy iti tunggal supot babaen kadagiti Personnel ti DA-LGU Cabugao. 

Iti pannakiuman ti Web In-Action idi Agosto 31, 2012, imbatad ni MENRO-Designate Edgar S. Balangatan a saan laeng nga iti panagipadawatan  ti seedlings ti akem ti Municipal Plant and  Nursery no di pay ket agpatubo kadagiti bukel ti kayo, mangasikaso ti seedlings, agited ti pagsugot, ken mangmonitor no naimula met laeng ken nataraken dagiti naited   kadagiti nagkiddaw/nagala  ti seedlings.

Innayonna a daytoy Butsina ti nalaka ken mayadu  a patanoren ita a maimula a maited kadagiti umili. Malaksid ta nalaing nga agtengngel ti dam-eg ken linabag  ti daga, pakairanudan pay  ti agraraay a naganus  no   agbunga ken  maaramid  a naisangayan  a saramsam a pagkakitaan ken mailako  kadagiti sinukaan stand iti igid ti National Highway   iti   Poblasion.

Ti Municipal Plant and Nursery ket agtultuloy pay  a ditoy a maasikaso  dagiti pang-orchard a seedlings (fruit bearing trees)  a  pangsuportar ti kasapulan dagiti mangipakpakat ti  Re-Greening Program kadagiti amin a mabalin a pagmulaan a bakante a  daga ken lote iti masakupan ti Munisipalidad.

Imatmatonan ni Mr. Robert S. Savella, AT-DA LGU ti agtultuloy a pannakamantener ti Municipal Nursery  a  tartarabayen ni MENRO Edgar S. Balangatan  ken naisaad  iti lote ti Munisipio iti Brgy. Baclig, Cabugao, Ilocos Sur. # (Web In-Action)

SELEBRASION KEN WELCOME PROGRAM, NAANGAY ITI CABUGAO SCS

Cabugao, Ilocos Sur – Naangay ti selebrasion ti Buwan ng Wika iti  Cabugao South Central School   ken naigiddan ti  Welcome Program ti panagakem ni Mrs. Melvi S. Sajonia, Principal II kas Pangulo  ti nasao a pagadalan idi Agosto 31, 2012 iti Cabugao SCS Multipurpose Hall.

Naitampok iti selebrasion dagiti naipresenta dagiti Grade Levels a kaaduan iti nagduduma ti klasena a sala  nga adda pannakainaigna ti Tema ti Buwan ng Wika.

Iti nasao a programa, naigiddan ti sorpresa a panangipamatmat ti sibubukel a Teaching Force ti nasao a pagadalan babaen ti panang-welcomeda  ti panagtakem  ni Mrs. Sajonia a kas kabarbaro a  Principal ti nasao a pagadalan.

Bininsabinsa ni Ms. Jenny Savellano, Grade 6 Teacher ti kasasaad ti biag ni Mrs.  Sajonia ken iti umartap  a kinapintas ti record ti katugtugaw a Principal  kas mangisursuro ken pangulo ti pagadalan.

Nagyaman unay ni Mrs. Sajonia kadaytoy a pammadayaw/panangsarabo  a naited kenkuana. Imbatadna a nagturpos iti elementaria  ditoy a pageskuelaan, Cabugao South Central School  ket dakkel a pakaidayawanna ken karit para kenkuana a mapagserbianna a sidudur-as ti nagbasaanna nga eskuela. # (Web In-Action)

SAAN A PAUDI TI MEAT VENDORS NGA AGTITIMPUYOG

Cabugao, Ilocos Sur – Nagkakammayet dagiti Hog Meat Vendors nga idauluan ni Mr. Edison Sesuca a naki-dialog  ken ni Mayor Edgardo “Ediboy” S. Cobangbang, Jr. a nangidarirag ti panggepda a matulongan iti sektor-da nga agparparti ken agpapauraga iti Merkado Publiko (NISTC) idi Agosto 31, 2012 iti Opisina ti Mayor iti Municipal Hall.

Imbatad ni Mr. Dante Naval, Municipal Meat Inspector a nangtarabay kadakuada a  kalikaguman dagiti Meat Vendors a patibkeren ken pagkaykaysaen ti biangda tapno mapasayaatda met ti kasasaadda  ken para  iti sapasap a maserbianda.

Innayonna a kalpasan ti nabunga a dialog,  mapatgan ti kalikagum dagiti Meat Vendors a maikkan ti pagpuonan babaen ti LGU kasta pay dagiti kanaigna a kabaelan nga ited ti Munisipio a  benepisio a pakapalag-anan met  ti kasasaadda kas supapak   iti agtultuloy nga  akemda a makigamgamulo iti pannakaipaay  ti serbisioda   nga aglako iti napresko a karne a  makonsumo iti sapasap.

Nagyaman ken naragsakan dagiti Meat Vendors ken ni Mayor Ediboy  ti pannakaited kadakuada ti pannakataming dagiti pakaseknanda kas organisasion ket pagtalinaedenda latta ti anus ken pammatida  a mangipatungpal   ti kabaelanda a  tumulong a mangpaprogreso pay   ti ilida  a Cabugao.  # (Web In-Action)