Cabugao, Ilocos Sur – Naaramid ti Hands-on Exposure ti 20 nga MMSU Graduate Students ti Mariano Marcos State University (MMSU) tapno aramidenda ti “Bloodless Castration in Large Ruminants” babaen ti Burdizzo Technique idi Marso 2, 2013 kas paset ti kursoda iti Advances in Ruminant Production.
Dimmagas dagiti estudiante iti Cabugao-Dayo nga idauluan ni Prof. Jaime T. Salazar, Registered Veterinarian ket nakikoordinarda ken ni Municipal Meat Inspector Dante Naval pakaseknan ti panggepda ken dagiti programa para iti livestock sector iti institusionda. Nakisarsarita met ni Mayor Edgardo “Ediboy” S. Cobangbang, Jr. iti panagbisita dagiti estudiante ket sinuportaranna daytoy a hands-on activitiesda.
Nagturong ti grupo iti Sitio Lusong Suyo, Brgy. Baclig, Cabugao, Ilocos Sur a pakasarakan ti kaponenda a dua a baka a taraken ni Mr. Dominador Reynold Sabio, Presidente ti BACALL MPA. Kalpasan ti castration activities, nagtalinaed ti grupo iti Palay Shed ti BACALL MPA ket naangay iti panagsasarita ken ditoyda a nag-lunch.
Iti pannaki-amad ti Web In-Action, imbatad ni Mr. Dante Castillo ken Ms. Rona Cristobal, Graduate School Students a maragsakanda a makaammo a suportado ti LGU-Cabugao iti Agriculture Sector para iti napintas a pannakaipatungpal dagiti programa pang-agrikultura.
Impeksa met ni BACALL MPA President D. Reynold Sabio iti panagyamanna iti delegasion ti MMSU ken ti LGU-Cabugao iti pannakapili ti asosasionda a napanan dagiti nagbisita ditoy Cabugao. # (Web In-Action)
Cabugao, Ilocos Sur – Naangay ti 2nd High School Day Celebration a panangrambakda iti anibersario ti pannakaipasdek ti Sisim National High School, Brgy. Sisim, Cabugao, Ilocos Sur idi Marso 1, 2013 iti High School Stage and Open Auditorium ti eskuela.
Naitampok iti selebrasion iti pannakakorona ti Mr. & Miss High School Day kas kulminasion ti panagselebrarda a dinar-ayan dagiti estudiante, Teachers, nagannak, Opisiales ti Munisipio, DepEd, Barangay ken lumugar iti 7 a Feeder Barangays a pakaibilangan ti Barangay Sisim.
Impeksa ni Mrs. Rosemelinda D. Baclig, Head Teacher ti Sisim NHS iti ragsakda ti pannakadanon manen iti anibersario ti pannakaibangon ti pageskuelaan ket nagintek ti panagyamanda kada Mayor Edgardo “Ediboy” S. Cobangbang, Jr. ken ni Diputado Ryan Luis V. Sison a maibilang kadagiti Pundador ti eskuela ken sanggirda iti agtultuloy a panaglupos ti pagadalan agingga iti agdama.
Pinadayawan met ni Assistant Division Superintendent, Dr. Estrella Soria iti napintas a panagkikibin dagiti amin a nakaigapuan ti pannakaipasdek ti Sisim NHS. Babaen ti agtultuloy a panagkammayet ti LGU, Kongresional, DepEd, ken Feeder Barangays (Maradodon, Catucdaan, Cael-layan, Sisim, Alina-ay, Aragan ken Turod-Patac), masirmatana ti nadur-as a masakbayan ti Sisim NHS.
Kalpasan dagiti Intermission numbers a naiballaet, kinoronaan da Nag-Provincial SK Federated President Deogracias Jose Victorino “DJ” H. Savellano ken ni Dr. Estrella Soria ti Mr. & Miss 2nd High School Day.
Agtultuloy nga itutulong iti benneg ti Edukasion ditoy a pageskuelaan ti kaipapanan ti panagmensahe ni Hon. DJ Savellano.
Naited met ti gundaway a nangorona kadagiti Prinsipe ken Prinsesa da SBM Vicky S. Serna, Committee Chair on Education, SBM Carlos V. Sison, SBM Josefina S. Vallejo, SBM Dr. Jemaima S. Tan-Yee ken Barangay Captain Ruben Siruno a binayabay ida dagiti kinaasmangda.
Pannakaited ti Sashes ti impaay dagiti nagannak kadagiti annakda a Prinsipe ken Prinsesa.
Panangipateg ti naited a pagadalan ti imbisik ni SBM Vicky S. Serna iti panagsaritana. Innayonna nga iti agtultuloy a pagsayaatan ti eskuela ken dagiti agad-adal ditoy a deppaar ti ilungalongda iti Konseho Munisipal.
Nangipaay met ti Mensahe da SBM Dr. Jemaima S. Tan-Yee ken SBM Josefina S. Vallejo ket nagyamanda iti pannakaawisda a makipagselebrar ken makikaysa iti panagdur-as a nagun-od ti pageskuelaan ti Brgy. Sisim.
Nakipaset met iti selebrasion da Mrs. Lilia S. Savella, Head Teacher ti Pug-os National High School ken Ms. Dana Osborne, Post-Graduate Student a taga-California, USA. # (Web In-Action)
Cabugao, Ilocos Sur – Nakipaset ni Mayor Edgardo “Ediboy” S. Cobangbang, Jr. iti naangay a panaginnallawat dagiti Outgoing ken Incoming Registered Nurse for Health Enhances of Local Services (RN-HEALS) iti Rural Health Unit of Cabugao idi Pebrero 27, 2013.
Iti pannaki-amad ti Web In Action iti Marso 1, 2013, imbatad ni Ms. Beverly V. Ramos, DOH Representative ti Cabugao a simmukat ti sabali a grupo ti Registered Nurses (10) ken tallo (3) a Rural Health Midwife a mangtulong iti pannakaipatungpal ti Serbisio-Medikal ti ili ti Cabugao, Ilocos Sur.
Innayon ni Ms. Ramos nga iti pannakaideploy ti RN-HEALS iti RHU-Cabugao ket tapno maasa ti kabaelanda iti propesionda a maisagsagana iti umagpang a pannaka-empleoda iti benneg ti Medikal.
Kangrunaan nga akem ita dagiti RN-HEALS ti mangtulong iti trabaho ti Committee on Health Team ti Kalusugan Pangkalahatan Program kadagiti barangay kas mayataday iti programa ti Gobierno Nasional nga ipatungpal dagiti LGU’s. # (Web In-Action)
Cabugao, Ilocos Sur – Naaramid ti Mangrove Planting iti aplaya ti Barangay Pug-os, Cabugao, Ilocos Sur nangrugi idi Pebrero 28, 2013 a ditoy ket tinarabay ni Mrs. Milagros R. Paz, Municipal Fisheries Coordinator.
Iti pannaki-amad ti Web In-Action iti Marso 1, 2013, imbatad ni Kagawad Alfonso Asunio, Presidente, Pug-os Fishermen’s Association, umabot ti 21,400 a kapuon ti mangrove seedlings ti maimulada itoy a petsa. Maisaruno ti panagpatulongda iti DA-LGU iti pannakaipan ti plakard iti ayan dagiti namulaan a paset ti kadilian tapno maipawil pay laeng ti panangasak dagiti agkalap kadagiti kaimulmula a seedlings.
Dagiti Mangrove Seedlings ket inted ti BFAR Region 1 kas pangsustener ti programa ti panangpasayaat ti kabaybayan a nagkammayyetan ti BFAR nga idauluan ni Regional Director Nestor D. Domenden, CESO V ken ti LGU Cabugao iti panangidaulo ni Mayor Edgardo “Ediboy” S. Cobangbang, Jr. # (Web In-Action)
Cabugao, Ilocos Sur – Naipaayan ti Financial Assistance dagiti biktima ti uram ti balay iti Barangay Sagayaden, Cabugao, Ilocos Sur idi Pebrero 28, 2013 iti Opisina ti Municipal Chief Executive ti ili.
Kadua ni Mayor Edgardo “Ediboy” S. Cobangbang, Jr. ni MSWD Officer Mrs. Lydia S. Gazmen a nangiyawat ti tulong kadagiti maseknan nga impaay ti DSWD Region 1 babaen ti pannakikammayet ni Mayor Ediboy ken ti MSWD Officer ti LGU-Cabugao iti nadakamat nga Ahensia. # (Web In-Action)
Cabugao, Ilocos Sur – Inyallawat ni Mayor Edgardo “Ediboy” S. Cobangbang, Jr. dagiti electrical tools kadagiti 20 nga agtutubo nga agsansanay iti Electrical Installation and Maintenance babaen iti DSWD idi Pebrero 28, 2013 iti Cabugao Cultural and Sports Complex, Brgy. Rizal, Cabugao, Ilocos Sur tapno adda usarenda a mangibiag ti naadalda nga ababa a kurso.
Inimatangan da Vice Mayor Danny Q. Gazmen ken MSWD Officer Mrs. Lydia S. Gazmen ti pannakaited dagiti ramit pang-elektrisidad nga usaren dagiti nagsanay.
Iti Marso 1, 2013, inted ni TESDA Provincial Director Joel Pilotin ti P3,550 1st Tranche Allowance iti tunggal Trainee ti Electrical Installation and Maintenance kasta met iti P1,930 a para iti tunggal Trainee ti Beauty Care, kas iti Hilot, (Massage). # (Web In-Action)
Cabugao, Ilocos Sur – Nagturong ditoy Cabugao, Ilocos Sur ni Forester Eduardo T. Malasig, Environmental Specialist II ti Environment Management Bureau (EMB), DENR Regional Office No. 1 ket kinadua ni MENRO Designate Edgar S. Balangatan, AT ti DA-LGU a nangbisita ti pakaseknan ti Solid Waste iti Poblasion ken idiay Ecology Center.
Iti pannaki-amad ti Web In-Action iti Pebrero 28, 2013, imbatad ni Forester Malasig a regular monitoring ti immayanna nupay nagbalinen a Consistent Model LGU ti Cabugao iti namitlo a daras iti implementasion ti Solid Waste Management Program ti Gobierno. Inlatak ni MENRO Balangatan a masussustener ti Solid Waste Management Program ditoy Cabugao, segun ken ni Forester Malasig.
Ti Solid Waste Management ket paset pay ti Environmental Management Program ti Munisipio nga ipatpatungpal ti LGU Cabugao nga idauluan ni Mayor Edgardo “Ediboy” S. Cobangbang, Jr. tapno mamantener ti umisu a pannakaidalimanek ti basura a paset ti itutulong iti pannakaalay-ay ti epekto ti Climate Change iti aglawlaw. # (Web Situational Report)
