TAEKWONDO CHAMPIONSHIP GAMES, NAGAPIT TI CABUGAO TI BALITOK!

Cabugao, Ilocos Sur – Idi Abril 26, 2012, nakisalip ti Cabugao Taekwondo Club iti naangay  nga   2012 INISA REGIONAL AGE GROUP CHAMPIONSHIP a napasamak iti Robinson’s Ilocos Atrium, San Nicolas Ilocos Norte. 17 nga umaayam ti nagpartisipar ket inyalatda ti 3 a Gold, 3 Silver, 9 bronze, Champion ti Secondary Advance ken 1st Runner up ti Over-all Standing.

Iti sabali a salip, 9 a balitok ti inyalat ti nadakamat a Team iti naangay a CABUGAO FIESTA TAEKWONDO CHAMPIONSHIP idi Mayo 12, 2012 iti Cabugao Cultural and Sports Complex, Brgy. Rizal, Cabugao, Ilocos Sur. Malaksid ti balitok, nagakup pay dagiti 30 nga umaayam  ti 12 a Silver, 9 a bronze ken 1st Runner-up ti Over-all Standing.

Imbatad ni Mr. Rommel Singson,  Instructor ti Cabugao Taekwondo Club iti dakkel a panagyamanda  iti  suporta nga impaay  ni Mayor Edgardo “Ediboy” S. Cobangbang, Jr. iti pannakisalipda.

Ti Cabugao Taekwondo Club ket sanga ti Philippine Taekwondo Association, Region 1 Taekwondo Association ken miembro iti Philippine Olympic Committee ken World Taekwondo Federation. # (Web In-Action)

BALIK-CABUGAO 2012: NANGAYED KEN NABALLIGI!

Cabugao, Ilocos Sur – Naangay ti Balik-Cabugao  2012 iti Cabugao Central Park (CCP) iti Abril 25, 2012 a no sadino a ditoy ket nagpartisipar dagiti balikbayans  a naggapu iti nadumaduma a nasion iti lubong kasta met dagiti tubo ti Cabugao a naggapu iti Kamanilaan ken dadduma a lugar nga immay nakipagrambak iti panagpiesta ti ili.

Sakbay a naangay ti programa, naipabuya  kadagiti balikbayans babaen iti projector  dagiti proyekto a nagapuanan ti agdama nga administrasion ni Mayor Ediboy a nangpaprogreso kadagiti barangay ken ti sibubukel nga ili ti Cabugao.

Pammasangbay a sarita ti impaay ni Vice Mayor Danny Gazmen. Kinablaawanna dagiti balikbayans ken taga-Manila nga immay nakipagrambak ti Piesta. Bugas ti mensahena ti pannakataginayon ti napintas a timpuyog para iti naprogprogreso  a Cabugao!

Impamatmat ti Don Podring Orchestra ti naisalumina nga estiloda  ti panagtokar  ken pannakaipatayab dagiti  old-time favorite song  a namagpikapik  iti salonan. Kalpasan ti salsala, maballaetan manen ti exhibition manipud iti Orkestra: makapaisem ken makapakatawa dagiti eyes breaker nga impaay dagiti natataraki ken nalilibnos a kameng ti Orkestra. Dimmanggay met dagiti balikbayans ket dua kadakuada ti nangipaay iti panagkantada iti entablado babaen ti panangdanggay ti Orkestra.

Nagsarita met ni Bokal Jeremias “Jerry” Singson ti Ilocos Sur a kangrunaan a sangaili iti dayta a rabii  ket dinayawna ti napintas a liderato ni Mayor Ediboy ken ni Vice Mayor Danny Gazmen. No kastoy laeng, kuna ni Bokal Jerry  ket iti  saan a mabayag ket agbalin a siudad ti ili a Cabugao. Impagteng pay ti Bokal ti kablaaw ni Gov. Luis “ Chavit” Singson a kabsatna.

Dinayaw ni Bokal Jerry ti kinatimpuyog dagiti umili ti Cabugao a mangrambak ti panagpiesta ti ili. Maysa met ti Bokal kadagiti naayat a tumultulong iti pannakaited ti pagsayaatan ti ili a Cabugao.

Kabayatanna, mabasa iti rupa dagiti balikbayans ti di mailadawan a ragsakda a nakitinnakunaynay kadagiti adu nga umili  a nagbuya iti nagduduma a sala a naiparang  iti CCP auditorium.

Kadua ni Mayor Ediboy a nangsarabo ken nakidanggay kadagiti balikbayans da Vice Mayor Danny Gazmen, SB Member Vicky Serna, SB Member Dr. Carlito Pano, SBM Josefina Vallejo, SBM Jemaima Tan-Yee ken Dr. Johann Yee, SB Member Benedict Savellano ken ABC President,  Brgy. Captain Teddy U. Soller. # (Web In-Action)

 NOTE: Other Pictures of Balik Cabugao Night is posted on the Main Page The Gallery

GRAND PARADE, NABALLIGI A NAARAMID ITI ABRIL 25

Cabugao, Ilocos Sur – Napasamak ti Grand Parade iti malem ti Abril 25, 2012 a kaaldawan ti panagpiesta ti ili a Cabugao a nagpartisiparan iti amin nga opisina ken  ahensia  ti Gobierno Lokal ken Nasional a masakupan ti Munisipalidad ti Cabugao. 

Immuna a naguurnong dagiti nakipagpartisipar iti Cabugao Institute  Athletic Ground ket naaramid ti panagsasaruno ti Contingent nga opisial nga urnos ti Parada.

Immuna ti Grand Marshal a nangi-giya ti parade a sinaruno  ti PNP, BFP ken iti University of Luzon Drum and Bugle Corps, Dagupan City.

Maikapito a Contingent ti Elective Officials nga indauluan ni Mayor Edgardo “Ediboy” S. Cobangbang, Jr. a kaduana dagiti dadaulo ti opisina ken Section Chiefs ti LGU-Cabugao ken pangulo ti opisina ti National Government Agencies.  Nakiparada met dagiti Balikbayans ken Festival Sponsors, NGA’s,  NGO’s ken Cooperatives, pribado a pagadalan ken iti 11 a Cluster  ti 33 a barangays ti ili ti Cabugao  a binayabay ti Marching  Band iti pageskuelaan a masakupanda.

Naannayas ken nasayud ti panagdaliasat ti parada a nagrikus iti kalsada ti poblasion ken iti National Highway. Nagtitipon dagiti nakiparada iti CI Athletic Ground a ditoy ket binuyada ti exhibition ti University of Luzon Drum and Bugle Corps, Dagupan City..

Segun ken ni SB Secretary Maxfel S. Suboc, Chairman, Komite ti Parade, naballigi ti naisayangkat a Grand Parade ken adu ti bilang ti nakiparada. # (Web In-Action)

  NOTE: Other Pictures of Ragsak Cabugao Festival 2012, Grand Parade is posted on the Main Page, The Gallery!

ADMINISTRATION NIGHT, NASANGAILI DA VICE GOV. DV KEN DIP. RYAN

Cabugao, Ilocos Sur – Nasangaili ti umili ti Cabugao da Vice Governor DV Savellano ken Diputado Ryan Luis V. Singson, First District, Ilocos Sur iti Administration Night ken koronasion ti Ms. Cabugao 2012 iti karabiyan ti Abril 24, 2012 iti Cabugao Central Park (CCP), Brgy. Bonifacio, Cabugao, Ilocos Sur a no sadino a ditoy ket naigiddan ti presentasion ti Farmers & Fisherfolk  sakbay a nakoronaan ti Reyna ti Cabugao 2012.

Malaksid kadagiti naisigud iti umuna nga aldaw (Abril 21) a balikbayans, adu pay ti nainayon a simmangpet agraman bisita ken ag-balik  Cabugao nga umay makipiesta iti ingungotenda a naggapuanda  a lugar.

Iti panaglukat ti programa, impaay ni Mayor Edgardo “Ediboy” S. Cobangbang, Jr. ti nabara a kablaaw ken impeksana iti nalaus nga ayat ken panagyamanda iti Gobierno Munisipal iti natunos a pannakakigamulo dagiti opisina ti LGU, barangay ken umili iti madama a  pannnakaigannuat ti 7 nga aldaw (Abril 21-27) a panagpiesta ti ili a Cabugao.

Linugayanna dagiti balikbayans ken bisita a makipagragsak iti Piesta kasta met dagiti inna (RIC) a nangpangayed  ti tallaong, opisiales ken empleados ti nadumaduma nga Ahensia ken opisina ken aminen a sangaili a nakiragup kadaytoy a rabii iti auditorium  ti CCP.

  
Nagyaman met ni Diputado Ryan ti pannakaawisna iti Piesta ket dinayawna ti nalaing a panagidaulo ni Mayor Ediboy a namagprogreso ti ili a  Cabugao  ket bininsa ti Diputado dagiti naipatungpalen a proyekto   ditoy nga ili babaen  iti Gobierno Munisipal nga idauluan ti Alkalde. Imbatad ti Diputado a nakaraman latta ti ili a  Cabugao iti aniaman  a proyekto para iti Umuna a Distrito.

Kanaig  itoy, impaay  da Diputado Ryan ken Mayor Ediboy ti Ceremonial turn-over ti 33 a water pump generators ken 33 rolyo ti hose (dos pulgada) kadagiti pangulo ti nadumaduma nga asosasion ti mannalon iti 33 a barangays ti ili a Cabugao. Naisaruno a naiyawat ti kupon ti maitedto  a ganagan iti tunggal mannalon. Impakaaammo  ni Dip. Ryan ti panangited ni Gov. Luis “Chavit” Singson ti P100,000 a  para  iti panagpiesta ti ili a Cabugao.

Naiballaet ti panagsala dagiti opisiales, balikbayans, bisita ken opisiales ti RIC ken ti Barangay babaen iti panangipatayab ti Don Podring de Guzman Orchestra dagiti samiweng  a namagpikapik iti salonan.

Simmaruno ti pannakakorona ni Ms. Cabugao 2012, Ms. Babilyn Buemio ti Barangay Salapsap babaen kada Vice Gov. DV Savellano ken Ms.  Dina Bonnevie-Savellano.     Iti mensahe ni Vice Gov. DV, linagipna ti Piesta ti ili ken ti kaipapanan ti panagrambak dagiti umili.  Impadanonna kadagiti naitallaong  ti kablaaw ken pannakipagrambak ni Gov. Luis “Chavit” Singson iti panagpiesta ti ili a Cabugao.

Naiballaet   ti pannakaipaay ti   sag-P20,000 a para iti Rural Improvement Club (RIC) iti 33 a barangays ti Cabugao. Nakiragup ti amin  a pangulo ti RIC iti  ceremonial awarding-na.
Naaramid ti Investiture dagiti sangapulo a prinsesa iti babaen ni Queen Babylyn 1st  babaen ti pannakaited ti akem dagiti opisiales ken balikbayans a naitallaong iti  pannakaisaad ti coronet, banda ken tropeo  ti tunggal prinsesa.

Iti panagngudo ti ragragsak, nayawat ti pammadayaw iti LGU- Cabugao babaen ti panangidaulo ni  Mayor Ediboy a binayabay dagiti  naitallaong a pangulo ti opisina ti LGU iti “Seal of Good House keeping”  nga  impaay ti Department of the Interior and  Local Government (DILG) nga inrepresentaran ni Ms. Connie L. Quinola, LGO 5 Officer ti MLGOO-Cabugao.

Kamaudiananna, impampamatmat met  ti Don Podring de Guzman Orchestra ti exhibition  dagiti kamengna a nangnayon a nangray-aw ken nangparagsak kadagiti adu a nagbuya iti CCP.

Iti  dayta a rabii ti Abril 24, 2012, dimmar-ay met da Bokal Jerry Singson,  Bokal  Atty. Ronnie Rapanut,  Vice Mayor Danny Gazmen, SB Member Vicky Serna,  SB Member Dr. Carlito Pano, SB Member  Josefina Vallejo, SB Member Benedict Savellano, SB Member Jemaima Tan-Yee, ABC President Brgy. Captain Teddy U.  Soller, Kapitanes ti Barangays,   SB Member Regina Valdez ti Solano, Nueva Vizcaya ken Atty. Romeo Sajor ken di nainagananen a balikbayans ken sangaili.
Nagpaay a Master of Ceremonies da SB Secretary Maxfel S. Suboc, Ms. Melvi S. Sajonia ken Ms. Odette Somera. # (Web In-Action)

STREETDANCING, SHOWDOWN COMPETITION, ADU TI NAGBUYA!

Cabugao, Ilocos Sur – Naipabuya ti streetdancing iti malem ti Abril 24, 2012 a nangparagsak ti panagpiesta ti  ili a Cabugao.
Naguurnong dagiti agsasalip a grupo iti sango ti Cabugao Cultural and Sports Complex  ken sango  ti Munisipio. Dagiti grupo ti agsasalip: Sisim National High School, Pug-os NHS, Lipit NHS, Cabugao NHS, Cabugao Institute ken Zone 2, DepEd Cabugao District. Naipakaammo ti annuroten ti panagsala iti kalsada ken napalagipan dagiti Marshals ken Medic iti annongenda iti pannakaipatungpal daytoy a salip iti baet ti kinadagaang  ti panawen. Timmulong  ti Municipal Police Station nga idauluan ni COP William N. Nerona iti pannakaiwardas ti trapiko ken pannakai-giya ti aktibidad.
Sakbay a naggunay ti linia dagiti agsala, nagsarita ni Mayor Edgardo “Ediboy” S. Cobangbang, Jr. iti sango ti Munisipio iti imatang dagiti opisiales a mangiwardas iti salip ken umili nga agbuya ket nagyaman ti Alkalde  iti napintas nga urnos ti aktibidad a kas maysa a maipabuya a  pangrambak iti panagpiesta ti ili.
Nagtungpal ti streetdancing iti nalawa a  compound  ti Cabugao Institute a ditoy a naaramid ti showdown competition    a nakaiparangan ti pangsalip a presentasion ti innem a grupo ti agkokontes. Tallo ti nagpaay a Hurado ti salip nga idauluan ni Mr. Bernie Sistoza, tubo ti Cabugao ken agtartarabaho idiay Maui, Hawaii.
Nagyaman met dagiti reprep a nagbuya gapu iti napasnek a panagsala dagiti partisipantes ken ti napintas a pannakaisagana dagiti akemda ken  nausar a bambanag  iti pabuyada.
Nagpaay ni Ms. Melvi S. Sajonia nga Over-all Coordinator ti nasao a pasalip ken  katinnulongna  da Ms. Odette Somera ken SB Secretary Maxfel S. Suboc kasta pay dagiti dadduma a mangisursuro ken pannakabagi ti LGU-Cabugao a di nainaganan.  # (Web In-Action)

CLICK HERE TO VIEW MORE PHOTOS!

  CLICK HERE TO VIEW MORE PHOTOS!

INDUCTION PROGRAM TI FEDERATED RIC, NAARAMID ITA NGA ALDAW

Cabugao, Ilocos Sur – Naaramid ti Induction Program and Raffle Draw ti Federated of Rural Improvement Club  (RIC) iti Munisipalidad ti Cabugao ita nga aldaw, Abril 24, 2012 iti Cabugao Cultural and Sports Complex, Brgy. Rizal. Cabugao, Ilocos Sur.

Naluktan ti programa babaen iti Opening Prayer ni Mrs. Susan Cabasug, RIC Vice President. Welcome Remarks ni Ms. Grenalyn Amoroso, RIC Federated President. Bugas ti mensahe ni SB Member Vicky S. Serna, Chairman, Komite  on  Women, ti panangtaginayon dagiti babbai ti  panagkaykaysada a mangpasayaat iti sektor-da.

Pinagsapata ni Mayor Edgardo “Ediboy’ S. Cobangbang, Jr. dagiti opisiales ti Federated RIC nga idauluan ni Ms. Grenalyn Amoroso iti RIC Carusipan.

Kalpasanna, bimunot ni Mayor Ediboy iti lima a Consolation Prizes iti tambiolo kas pakauna ti Raffle Draw. Iti panagmensahe ti Alkalde, kinablaawan ken dinayawna ti napintas a tunos dagiti RIC Officers ken Members ti ili a Cabugao. Inawisna ida amin inton rabii a panagatendar ni Gov. Luis “Chavit” Singson kas naisangayan a sangaili  tapno agkakammayetdanto a mangidarirag ti proyekto para iti RIC babaen iti Opisina ti Gobernador.

Kalpasan ti intermission number a mangragragsak ti programa nga iparang dagiti RIC Members ket maiballaet ti pannakabunot dagiti numero iti tambiolo a makaigasat kadagiti agur-uray a premio iti lamisaan.

Idauluan da Vice Governor DV Savellano, Mayor Edgardo “Ediboy” S. Cobangbang, Jr., Vice Mayor Danny Q. Gazmen, Dr. & Dra. Steve Recel  ken ABC President, Brgy. Captain Teddy U. Soller dagiti nagidonar ti premio dagiti kangrunaan a nangabak iti raffle draw. Kalpasan ti draw, naserraan ti programa babaen ti panagyaman ni Municipal Agriculturist Zenaida S. Andrada iti panagballigi daytoy nga aktibidad a mangrambak ti aldaw ti Piesta a  sakupen ti opisina nga idauluanna iti LGU-Cabugao  nga imatonan ken tarabayen. # (Web In-action)

Panagsapata dagiti RIC Presidents babaen ken ni Mayor Ediboy

Picture Taking da Mayor Ediboy; SBM Vicky Serna; Joenah Sevilleja,RIC Coordinator ken dagiti RIC Presidents