MAPABORAN TI AMIN A MAKIPARTISIPAR TI PANAG-DAYO

Cabugao, Ilocos Sur -  Nasayud ti pannakatarabay ita ti Dayo-Cabugao maigapu iti nasamay a pannakamonitor ti panagwerret ti puonan nga agsirsirkular nga iturturong ti Management  ken ti assideg a panagkikita dagiti ag-dadayo iti linawas.

Imbatad ni Mr. Dante Naval, Municipal Meat Inaspector a maysa nga indikasion ti panagdur-as ti Dayo ket ti pannakaipasdeken  ti baro a pagopisinaan dagiti mangiturturong ti Slaughterhouse ken Municipal  Livestock Office  a mabangon  met laeng iti nagsaadan ti dati nga Municipal Livestock Office. Daytoy a proyekto ket inlungalong ti Gobierno Munisipal iti panangidaulo ni Mayor Edgardo “Ediboy” S. Cobangbang, Jr. tapno maikkan ti napintas a pagyanan dagiti umili a maki-transaksion iti pakaseknanda.

Nupay kasta, iti pannakiuman ti Web In-Action kadagiti makidaydayo idi Agosto 25, 2012, imbatadda a nalaka a matun-oyanen  ti panggep ti Dayo nga agserbi para iti pagsayaatan ti sapasap  kas impaganetget ni Mayor Ediboy iti panangrugi ti operasion ti Dayo. 

Kanaig daytoy, babaen ti nakammayet a panagtutunos dagiti dumadayo, koridor, agpupuonan, agparparti ken iti naan-anay a panangtarabay ti Gobierno Munisipal kadakuada ket masaluadan ti interes  ti tunggal maysa iti pannakipagnamingda  iti pakaseknan ken  pannakaidur-as ti industria ti animales. # (Web In-Action) 

MATH CLASS TI UBBING TI TUNGGAL SABADO, MAMULIDA PARA ITI SALIP

Cabugao, Ilocos Sur- Maar-aramid ti MTAP-DepEd Saturday Math Program iti intero a Cabugao DepEd District babaen ti Division Memo Blg. 29, s. 2012. Umabot ti 966 nga agad-adal ti makipaset iti 6 a Sabado a pannakaigannuat itoy. Nangrugi idi Agosto 11 inggana ti Setiembre 15, 2012 a  maang-angay iti Cabugao North Central School.

Iti pannakiuman ti Web In-Action iti Superbisora ti DepEd Cabugao District idi malem ti Agosto 25, 2012, imbatadna nga 11 porsiento ti ngimmatuan ita ti bilang ti ubbing a nakipaset kadaytoy a panagadal ti matematika.

Buklen ti agad-adal iti Grade 1- 190; Grade II- 173; Grade III- 128; Grade IV-  156; Grade V - 164 ken Grade VI- 155.

Ditoy met  nga agisuro dagiti Mathematician Teachers nga  inrekomenda ni Math Coordinator Nora R. Quibilan ken inaprobaran  ni Public Schools District Supervisor Helen V. Siruno.

Sagudayen ti Division Memorandum, panggep daytoy a programa a mamuli  ken maidur-as  dagiti agad-adal  iti nakaisigudan nga  abilidad dagiti agad-adal iti numero ken masublian ti naadalda iti kallabes a tawen ken  tapno maisaganada a nasayaat para iti aniaman a  maangay a salisal iti Math ken para pay  iti Entrance Examination ti Grade VI. # (Web In-Action) 

MOBILE PROCESSING TI CSC, 1 DAY DITOY CABUGAO

Cabugao, Ilocos Sur – Naisangrat ti 1 aldaw a panagopisina ti pannakabagi ti Civil Service Commission-Ilocos Sur Field Office ditoy Munisipio ti Cabugao, Ilocos Sur idi Agosto 24, 2012 a no a sadino a ditoy ket nagaplikar dagiti  empleado para iti Mobile Processing of Examination Application (Professional and Sub-Professional Levels) a maangay ti paeksamenda  inton Oktubre 21, 2012 iti Vigan City, Ilocos Sur.

Imbatad ni Ms. Mary May N. Querubin, Sr. Personnel Specialist, CSC Ilocos Sur Field Office a paset ti programa ti opisinada nga umay mangidanon ti panagaplikar ken processing ti papeles dagiti agpanggep nga ageksamen. 

Naaramid ti 1 day a panagrehistro ken panagaplikar  ditoy Cabugao. Tinarabay  ni Miss Mimi S. Sison, Human Resource Management Officer ti LGU-Cabugao ti pannakabagi ti Opisina ti  Civil Service.  # (Web In-Action)

AGMULMULA TI LASONA KEN BAWANG, NAREORGANISAR

Cabugao, Ilocos Sur (Agosto 24, 2012) – Nareorganisar ti mangidaulo  ti Cabugao Onion and Garlic Growers Association iti ili a Cabugao iti Municipal Conference Hall.

Nag-Preside ni Farmers Federated President Elmer G. Bromeo iti pannakapili dagiti opisiales ti Asosasion. Ngem sakbayna, nakitaripnong ni Mayor Edgardo “Ediboy” S. Cobangbang, Jr. ket impadamagna ti pannakaipasdek ti Bagsakan  a mangtaming iti pakaseknan  dagiti produkto a nateng iti Munisipalidad.

Indilig  ti Alkalde ti napintas a pannakatarawidwid ti Cabugao-Dayo iti pannakataming ti Bagsakan. Nupay kasta, paasikaso ti Ama ti Ili  ti naan-anay a pannakaalokar daytoy a pagimbagan dagiti mannalon nga agmulmula ti   nateng iti Konseho Munisipal tapno maipatakder ti pasdek ti nasao a proyekto ken   maikkan ti pinansial a mausar iti panagoperarna.

Impeksa dagiti nagatendar a mannalon ti nalaus a panagyamanda iti panangisakit ni Mayor Ediboy iti sektor-da nga agmulmula ti nateng ken high value crops. Ket babaen ti pannakaorganisarda, kayatda a padakkelen ti asosasionda  iti  agtultuloy a pannakikammayetda iti Gobierno Munisipal ken Ahensia ti Gobierno a maseknan a makatulong kadakuada tapno matulonganda ti bagida ken  komunidad-da.

Dagiti napili nga opisiales ket isuda: Henry Saliganan, President; Benjamin Saquiton, Vice President; Diana Gamiao, Secretary; Melchor Gaspar, Assistant Secretary; Lito Reintar, Treasurer; Aida Aquino, Auditor; Jonel Suniega, Business Manager; Myrna Garcia, Alexis Baclig, Benigno Piros, Nerio Garcia ken Guarino Savellano, P.I.O.

Maangay ti regular meeting-da iti tunggal umuna a Miyerkoles ti bulan iti oras ti  9:00 A.M.  # (Web In-Action)

DAR-MARO, MANGIBABAET ITI PAKASEKNAN TI AGINDEG TI BRGY. BATO

Cabugao, Ilocos Sur – Indauluan ni Brgy. Captain Santos Aquino, Jr. ti Barangay Bato dagiti agindeg a  maseknan  Iti katulagan iti panagindegda   iti daga ni Mr. Lucresio  “Lucky”  Sajor  a masarakan iti  Brgy. Bato, Cabugao, Ilocos Sur idi Agosto 23, 2012 iti Municipal Conference Hall, Cabugao, Ilocos Sur.

Tinarawidwidan ni Ms. Elizabeth S. Pablico, DPA ken Caretaker MARO ti nasao a miting.

Imbatad ni Mr. Pablo G. Quemi,  ARPT/DF, a nataming ti sinaguday ti Compromise Agreement iti nagbaetan  dagiti 22 nga agindeg  ken  ni Mr. Sajor nga agpaso iti bulan ti Oktubre 2012. Impalagip ti MARO ti pagrebbengan dagiti agindeg ken ti kaipapanan ti            katulagan.

Kanaig itoy, ti DAR-MARO ket itultuloyna ti akemna a mangipakat ti programa ti Gobierno  iti  panakaited ti  libre a daga    kadagiti tattao a kualipikado a maikkan,  mangrisut ti susik iti agaywan ken akinkukua ti  daga, pannakapapigsa  dagiti kooperatiba a naorganisar babaen ti DAR, pa-seminar ti livelihood projects  kadagiti benepisiario ti Agrarian Reform Communities wenno ARC.

Buklen ti empleado ti MARO-Cabugao iti agdama  da:  Ms. Elizabeth S. Pablico, DPA, Senior Agrarian Reform Program Technologist/Caretaker MARO; Mr. Teodoro P. Par, ARPT/Development Facilitator; ken Mr. Pablo G. Quemi,  ARPT/DF. # (Web In-Action)

NAGATENDARDA TI SEMINAR TI ORGANIC AGRICULTURE

Cabugao, Ilocos Sur – Naibaon da Mr. Obas Bill Y. Baclig, AT/DA-LGU ken ni Mr. Dominador Reynold Sabio, Federated Farmers Vice President a pannakabagi ti Munisipio ti Cabugao iti biang  ti mannalon ken implementor iti maysa nga aldaw a panagseminar iti Organic Agriculture (Understanding the Organic Standard and Certification Process) idi Agosto 23, 2012 iti Aniceto Mansion, Vigan City a no sadino a ditoy  ket naiyadal ti proseso ti pannakaipakat  ti RA 10068 (Organic Agriculture Act 2010) kasta met dagiti kakibinna a programa ken proyekto para kadagiti mannalon iti intero a pagilian.

Daytoy a seminar ket insayangkat ti Organic Certification Center of the Philippines babaen iti panangtarabay ti DA Regional Field Unit 1.

Daytoy a pakauna a seminar ket manamnama a mayallatiw ti naadal da Baclig ken Sabio kadagiti mannalon ti Cabugao. Segun iti mapagtalkan a pagdamagan, adu pay nga eskediul ti seminar a maaramid nga iwayat ti DA-RFU 1.

Kangrunaan a turongen ti programa ket ti pannakapataud ti surplus iti magapuanan dagiti mannalon iti agro-industry ken food security nga agtultuloy a tun-oyen ti Gobierno Nasional nga  agpababa iti benneg Lokal. # (Web In-Action)

NAGSELEBRAR TI BUWAN NG WIKA TI CABUGAO DEP-ED DISTRICT

Cabugao, Ilocos Sur – Sinelebraran ti Cabugao DepEd District  ti Buwan ng Wika ita nga Agosto 23, 2012 iti Cabugao SCS Social Hall.

Pammasangbay a kablaaw ken sarita  ti inted ni Mrs. Melvi S. Sajonia, Principal II, CSCS sa nagsarita ni Mrs. Helen V. Siruno, Public Schools District Supervisor kalpasan ti intermission dagiti ubbing.

Inlawlawag   ti Superbisor ti pannakausar  ti 12 a  lengguahe a pakaibilangan ti   Iloko iti pannakaipakat ti K to 12 Program ti DepEd ken bininsana ti pateg ti Nailian a Pagsasao a kas iti Filipino a simbolo ti nailian a panagmaymaysa.

Impasagepsep pay ti Superbisor nga ipateg ken itandudo ti bukodtayo a pagsasao ta dayta ti mangiladawan ti kinasiasinotayo.

Panangipateg ti kabukbukodan a pagsasao ken kina-Cabugaoenio ti bugas ti mensahe ni Mayor Edgardo “Ediboy” S. Cobangbang, Jr. Nabara ti panangkablaaw ti Ama ti Ili kadagiti amin a nagpartisipar kadaytoy nga okasion. Dinayaw ti Alkalde ti wagas a pannakaiparang ti programa ti panagselebrar ti Buwan ng Wika. Ti   pannakaipabigbig kas agkikinnaawatan babaen ti sao ken  pannakipagili ti Cabugao ti kaipapanan pay ti panagsarita ti Alkalde Munisipal.

Maikadua a paset ti programa ket isu ti panagsasalip dagiti agbasbasa iti panagdaniw, panagkanta ken panag-drowing ti poster  a mangparagsak ti selebrasion. Nabingay ti pasalip iti tallo a grupo ken pasdek-eskuela a nagyanan.

Inyam-ammo ni Ms. Josie Bisco dagiti nagpaay a Hurado, imbinsa met ni Ms. Marilina Salarzon ti kriteria dagiti salip, ken Oryentasyon ni Mr. Rommel Santella, District Filipino Coordinator.

Binayabay dagiti mangisursuro a nagpaay a Hurado kadagiti pasalip: Tula-Estrellita M. Siruno, Genaro Solmerin, ken Ronel Ubaldo; Awit-Julia Cayso, Mildred Naval, ken Nick Bringas; Poster-Making-Melvi S. Sajonia, Rodel Suniega ken Edwin Savellano.

Maikatlo a parte ti programa ket ti pannakaipakaammo dagiti nangabak ken pannakaited ti Sertipikoda kalpasan ti agsaruno nga intermission number dagiti agad-adal.

DAGITI OPISIALES TI SAMAHAN NG MGA GURONG NAGTUTURO SA FILIPINO:

Josie Bisco, Pangulo;  Marilina Salarzon, Pangalawang Pangulo; Marilyn Raciles, Kalihim; Tomasa Sajonia, Ingat-Yaman; Merlinda Sajonia, Tagasuri; Tagapagbalita: Vilma Manantan, Liezel Sol, Rachel Somera, Imelda Peanut Lopez; Tagapamanihala:  Maximo Sunio, Ligaya de Pedro, Gina Rapin ken Aveliza Tapangco.

Nagpaay nga emcee da Mr. Donato Sambrana ken Mr. Maximo Sunio. # (Web In-Action)