Cabugao, Ilocos Sur – Naaramid ti 10th Comelec Chairman (CM) Victorino Savellano Memorial Run idi Pebrero 18, 2012 a no sadino a ditoy ket nagpartisiparan dagiti Marathoners (lallaki ken babbai) manipud agtawen ti 15 agpangato iti nadumaduma a sektor ken naggapu iti nadumduma a lugar kas pammadayaw ti namaris a pakasaritaan/lagip ti biag ni Nag-COMELEC Chairman Victorino A. Savellano ken pammigbig a kas maysa kadagiti naipangruna nga aldaw ti 3-Day Celebration ti 85th Foundation Anniversary ti Cabugao Institute a ditoy ket nagserbi met Daydi Dios-ti aluadna a COMELEC Chairman a kas Director ti nasao a pageskuelaan .
Ni Nag-COMELEC Chairman Savellano ket patanor ti ili a Cabugao, Ilocos Sur. Nagturpos iti Cabugao Institute iti sekundaria ken idiay UP Diliman iti kina-Abogasia. Nag-Hues, Nag-Mayor ti ili a Cabugao, Commissioner ken Nag-Chairman iti Commission on Elections (COMELEC).
Nangrugi ti pataray manipud iti pagadalan ti Cabugao Institute ket dinaliasatda ti ag-12 kilometro a distansia (CI to Port Salomague, Barangay Salomague ken nagsublida iti eskuela).
Nagpartisipar pay dagiti estudiante ken mangisursuro ti Agriculture Demo Campus (BARANG-AY, Labnig, San Juan, Ilocos Sur) ti Ilocos Sur Community College (ISCC) nga idauluan ni Dekano, Dr. Cesar Soller, DVM.
Naregget met ti partisipasion dagiti pannakabagi ti LGU Cabugao iti pannakaisayangkat ti panagtaray babaen ti panagtarabay dagiti First Aid a naglugan kadagiti Ambulansia. Nakitinnulong met dagiti Barangay Tanod (BPATS) dagiti barangay ti Poblasion ken dagiti nadaliasatan dagiti Marathoners.
Tinawen a maang-angay daytoy a Memorial Run babaen iti panangitandudo ti Development of Vigorous Body Thru Sports (DVBS) iti panangilungalong ni Vice Governor Deogracias Victor B. Savellano, anak ni Nag-COMELEC Chairman Victorino A. Savellano.
Iti pannakapadayaw dagiti nangabak, nagatendar met ni Dr. Gil Savellano, DepEd Official iti 2nd District ti Probinsia ti Ilocos Sur ket inasistiranna ni Dr. Soller a nagyawat ti Cash a papremio dagiti nagballigi a tumataray. # (Web In-Action)
No comments:
Post a Comment